Америкалик актёр Силвестр Сталлоне Нью Йорк штатининг нуфузли East Ҳамптон ҳудудидан деярли 25 миллион долларга янги уй сотиб олди. Бу кўчмас мулк актёрнинг уч қизи — София, Систин ва Скарлет учун харид қилинган. New York Post нашрининг ёзишича, битим тўлиқ нақд пул эвазига амалга оширилган.
Харид қилинган ушбу мулк илгари машҳур интерер дизайнерлари Фиби ва Жеймс Майкл Ховардларга тегишли бўлган. Улар хонадонни 2021 йилда 6,4 миллион долларга сотиб олиб, McAlpine Tankersley Architecture бюроси ёрдамида капитал таъмир ўтказган. Оддий коттеж тўлиқ қайта қурилиб, кенг ва замонавий қароргоҳга айлантирилган.
Бундан ташқари, Сталлоне Флорида штатидаги Палм-Бич туманида 35 миллион долларлик ҳашаматли қароргоҳга эгалик қилади.
Хонадон ҳақида батафсил
Уй Ист Ҳемптон (East Hampton) нинг энг машҳур ҳудудларидан бирида, Атлантика океанидан бор-йўғи бир мил нарида жойлашган. 40 сотих майдонли, дарвозалар билан ўралган ер профессионал ландшафт дизайни билан безатилган.
Ҳовлида асосий уй, очиқ ҳовуз, спа зонаси ва айвон мавжуд. Шунингдек, икки машинага мўлжалланган алоҳида гараж ҳам жойлашган.
Уйнинг умумий майдони 1 100 метр квадратни ташкил қилади. Унда 8 та ётоқхона, 10 та ҳаммом мавжуд бўлиб, ҳар бири дизайнерлик мебеллари ва санъат асарлари билан безатилган. Уч қаватли бинода замонавий лифт ҳам ўрнатилган.
Ички интерер икки қаватли залдан бошланади: бу ерда ёйсимон шаклдаги зинапоя жойлашган. Меҳмонхона марказида Лондоннинг Jamb фирмасига тегишли винтаж услубидаги камин жой олган. Пол қопламаси оқартирилган эман дарахтидан ишланган.
Овқатланиш хонаси фируза рангда безатилган. Ошхона эса юқори даражадаги профессионал техника: қимматбаҳо Lasanche плитаси, катта стол ва алоҳида нонушта зонаси билан жиҳозланган.
Шунингдек, оилавий меҳмонхона, билярдхона ва уй кинотеатри ҳам мавжуд.
Оила учун сармоя
Манбаларга кўра, Сталлоне бу уйни турмуш ўртоғи, собиқ модел Женнифер Флавин билан бирга айнан қизлари учун харид қилган. Қизларидан иккитаси яқинда Лос Анжелесдан Нью Йоркка кўчиб ўтган, учинчиси эса Майами университетида таҳсил олмоқда.
Оилапарварлиги билан машҳур бўлган актёр доимий равишда қизларига ҳар ишда ёрдам беришга ҳаракат қилади. Ижтимоий тармоқларда Сталлоненинг оиласи билан тушган суратлари тез-тез учраб туради. Бу янги қароргоҳ ҳам фарзандларига қулай ва хавфсиз яшаш муҳитини яратишга қаратилган навбатдаги сармоя сифатида баҳоланмоқда.
Изоҳ (0)