IIV Tezkor qidiruv departamenti tomonidan DXX bilan hamkorlikda Surxondaryo viloyati Denov tumanida o‘tkazilgan tezkor tadbirda to‘rt kishi bir kilo gashishni 20 ming dollarga sotayotgan vaqtida ushlandi. Bu haqda IIV matbuot xizmati xabar berdi.
Qayd etilishicha, ular “Qora dori 2025” keng qamrovli tezkor-profillaktik tadbiri doirasida qo‘lga olingan. Ularga nisbatan Jinoyat kodeksi 273-moddasi (giyovandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) beshinchi qismi bilan jinoyat ishi qo‘zg‘atilib, qamoqqa olish tarzidagi ehtiyot chorasi tanlangan.
“Qora dori 2025” tadbiri doirasida, shuningdek, Toshkent viloyati Ohangaron shahrida ikki kishi 500 gramm opiy giyohvandlik vositasini 25 ming dollarga sotayotganida daliliy ashyolar bilan qo‘lga olindi. Tezkor tadbir davom ettirilib, gumonlanuvchilarga tegishli buyumlar ko‘zdan kechirilganda yana 585 gramm opiy hamda 360 gramm gashish giyohvandlik vositalari topilgan va daliliy ashyo sifatida olingan. Holat yuzasidan Jinoyat kodeksi 273-moddasi beshinchi qismi bilan jinoyat ishi qo‘zg‘atilgan.
Farg‘ona viloyatida ham bir nechta holatlar aniqlangan. Xususan, Toshloq tumanida o‘tkazilgan tadbirda fuqaro o‘z tomorqasida 103 tup ko‘knori va 118 tup nasha giyohvandlik vositalarini yetishtirayotgani aniqlandi. Holat yuzasidan jinoyat ishi qo‘zg‘atildi.
Marg‘ilon shahrida o‘tkazilgan tezkor tadbirda fuqaro o‘z xonadonida 170 tup giyohvandlik vositasini yetishtirib kelayotgani aniqlandi va daliliy ashyo sifatida olindi. Holat yuzasidan jinoyat ishi qo‘zg‘atilgan.
“Qoradori-2025” tadbiri haqida
Bu DXX va IIV tomonidan tashkil etilgan keng qamrovli tezkor-profilaktik tadbir bo‘lib, mamlakat bo‘ylab giyohvandlik vositalarining noqonuniy muomalasiga qarshi kurashishga qaratilgan. Tadbirning asosiy maqsadi giyohvand moddalar va kuchli ta’sir qiluvchi dorilarni noqonuniy tarqatish, saqlash va yetishtirish bilan shug‘ullanayotgan shaxslar va guruhlarni aniqlash, ularning faoliyatiga chek qo‘yishdir.
2025-yil 3–4-fevral kunlari o‘tkazilgan dastlabki bosqichda respublika bo‘ylab 653 ta maxsus tadbir o‘tkazildi. Ular davomida jami 112 kilo 257 gramm giyohvandlik vositalari (geroin, opiy, gashish, sintetik moddalar) va 8 601 dona kuchli ta’sir qiluvchi dorilar musodara qilindi.
Izoh (0)