Buxoro shahrida “Qoradori—2022” tezkor profilaktik tadbiri o‘tkazilib, unda marixuana sotayotgan 19 yoshli fuqaro ushlandi, deb xabar bermoqda viloyat ichki ishlar boshqarmasi axborot xizmati.
Ma’lum qilinishicha, 8-avgust kuni sat 21:30 da Buxoro shahri IIO FMB jinoyat qidiruv xodimlari tomonidan tezkor tadbir o‘tkazilgan. Jarayon davomida Buxoro tumani “Shexoncha” mahallasida yashovchi, 2002-yilda tug‘ilgan M.M. boshqa bir fuqaroga marixuana sotayotganda ushlangan.
U Buxoro shahri “Ark” qo‘rg‘oni qarshisidagi bog‘ ichida bir dona oq qog‘oz bo‘lagiga o‘ralgan, viloyat ichki ishlar boshqarmasi ekspert kriminalistika bo‘limining sudga oid kimyoviy ekspertiza xulosasiga ko‘ra sof vazni 10,59 grammga teng bo‘lgan ko‘p miqdordagi marixuana giyohvandlik vositasini 3 million 200 ming so‘mga pullayotganda qo‘lga olingan.
Holat yuzasidan shahar IIO FMB tergov bo‘limi tomonidan M.M.ga nisbatan Jinoyat kodeksining 273-moddasi (giyovandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) 5-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Izoh (0)