Маданият вазирлигида хонандалар иштирокида концерт-томоша фаолиятида олиб борилаётган маданий-маърифий ишлар ҳамда “Санъаткор одоби” мавзусида йиғилиш бўлиб ўтди, деб хабар бермоқда вазирлик.
Йиғилиш кун тартибидан мамлакатимизда ижод қилаётган санъаткорларнинг маънавий-маданий фаолияти ҳамда “Санъаткор одоб-ахлоқи”, Ўзбекистон Республикасида фуқароларнинг виждон эркинлигини таъминлаш ва диний соҳадаги давлат сиёсати концепциясини тасдиқлаш тўғрисида"ги қонуннинг мазмун-моҳияти, санъаткорларнинг концерт-томоша фаолияти учун лицензия талаб ва шартлари ҳамда муаллифлик ҳуқуқи каби масалалар ўрин олган.
Йиғилиш аввалида президентнинг 2024 йил 14 ноябрдаги “Тадбиркорлар ҳуқуқлари ва қонуний манфаатларини ишончли ҳимоя қилиш чора-тадбирлари тўғрисида”ги 184-фармонининг мазмун-моҳияти тушунтирилди. Концерт-томоша фаолиятини амалга ошириш соҳасига оид мажбурий талаблардан хабардорлигини ошириш бўйича фармон билан тасдиқланган низомнинг тартиб-таомили бўйича концерт ташкилотчилари ва санъаткорларга тушунтириш берилди.
Йиғилиш давомида “Лицензиялаш, рухсат бериш ва хабардор қилиш тартиб-таомиллари тўғрисида”ги қонунга асосан “Ўзбекконцерт” давлат муассасаси томонидан концерт-томоша фаолиятини амалга оширишда санъаткорларнинг мажбурий талабларга риоя қилишини ҳамда асосий лицензия талабларида ижрочиларнинг “концерт-томоша соҳасида у ёки бу динни тарғиб қилмаслик” масалалари ҳам муҳокама қилинди.
Шунингдек, йиғилишда Конституция қонунлари ва бошқа қонунчилик ҳужжатларига сўзсиз риоя этиши, бошқа давлатларда бўлганида ўз мамлакат шаънини эъзозлаши одоб-ахлоқ, маданият, ўзбекона қадриятларни унутмаслик ҳақида сўз борди.
Қайд этилишича, вазирнинг биринчи ўринбосари Баҳодир Аҳмедов миллий урф-одатлар, қадриятлар ва анъаналарга ҳурмат билан муносабатда бўлиш, дабдабабозлик, шоҳона ҳаётни кўз-кўз қилмаслик ва бошқа салбий иллатларга йўл қўймаслик, жамоат жойларида, атрофдагилар эътиборини тортувчи ортиқча салбий ҳаракатларга йўл қўймаслик ҳақида таъкидлаб ўтди .
Шу билан бирга куй-қўшиқларнинг мазмунига эътибор қаратиш, муаллифлик ҳуқуқларининг бузилиш ҳолатларига ҳам тўхталиб ўтди. Шунингдек, ўз ижодлари давомида ватанга муҳаббат, садоқат, ватанпарварлик руҳидаги қўшиқларни кўпайтириш, ўсиб келаётган ёш авлодга намуна бўлишлари айтиб ўтилди.
Аввалроқ “Ўзбекистон Республикасида фуқароларнинг виждон эркинлигини таъминлаш ва диний соҳадаги давлат сиёсати концепциясини тасдиқлаш тўғрисида”ги қонун қабул қилингани ҳақида хабар берилганди.
Фуқароларнинг виждон эркинлигини таъминлаш ва диний соҳадаги давлат сиёсати концепцияси
“Ўзбекистон Республикасида фуқароларнинг виждон эркинлигини таъминлаш ва диний соҳадаги давлат сиёсати концепциясини тасдиқлаш тўғрисида”ги қонун лойиҳаси ва у билан тасдиқланаётган концепция лойиҳаси 31 январь куни қуйи палата мажлисида биринчи ўқишда қабул қилиниб, 10 февралгача жамоатчилик муҳокамаси учун жойлаштирилган эди. Жамоатчилик муҳокамаси жараёнида аҳолидан 400 тадан ортиқ изоҳлар, таклиф ва тавсиялар келиб тушган.
Олий Мажлис Қонунчилик палатасининг 11 февралдаги ялпи мажлисида ушбу қонун лойиҳаси қабул қилинганди.
Сенатнинг 20 февралдаги тўртинчи ялпи мажлисида Ўзбекистонда диний соҳадаги давлат сиёсати концепциясини маъқулланганди.
Изоҳ (0)