Ўзбек шоу-бизнесида хонанда Миржалол Неъматов номининг пайдо бўлганига кўп бўлгани йўқ. У бугунги кунда ижтимоий тармоқларда энг кўп изланадиган ва ҳар битта клипи миллионлаб томошабинлар эътиборига тушган саноқли хонандалардан бири. Хўш, Миржалол Неъматов ўзи ким? Келинг, қуйида бу саволга жавоб излашга уринамиз.
“Ўғлинг санъаткор бўлолмайди, пулсиз ҳеч нимага эришмайди”
Миржалол Неъматов туғилган йилини яширадиган хонандалар тоифасига киради. У шу кунгача бирорта интервьюсида ёши билан боғлиқ саволларга жавоб бермаган.
— Навоийдаги оддий, камтарона ҳаёт кечирадиган оилада туғилганман. Синглим ва укам бор. Отам устачилик билан, онам эса Навоийдаги марказий касалхонада оддий ҳамшира бўлиб ишлаган. Оиламизда санъаткорлар йўқ. Аммо онам болалигида ҳофиза бўлишни орзу қилган экан. Унинг ширали овози бор, қариндошларимиз тўй-ҳашамларда “Сиз ҳам бир куйлаб беринг”, деб микрофон тутишарди. Оила қуриб, орзулари саробга айлангач, онам менинг хонанда бўлишимни истади. “Ўғлинг санъаткор бўлолмайди, пулсиз ҳеч нимага эришмайди”, дейишганида ҳам менга ишонч берган онам бўлади, дейди Миржалол Неъматов.
“Отам мени ўқитиш учун Россияда ишлаган”
Миржалол Неъматов Тошкентга келиши ва молиявий қийинчиликларга учраган кунларини қуйидагича эслайди.
— Ўзбекистон давлат санъат ва маданият институтининг “Мусиқали драма актёрлиги факультетига ўқишга қабул қилинганман. Аммо тестларда паст балл тўплаганим учун шартнома асосида ўқишимга тўғри келди. Оддий, ойликка кун кўрадиган оила эдик. “Шартнома асосида ўқимайман”, деганимда ота-онам амаллаймиз, дейишди. Ўқишга кирган йилим отам шартнома пулини ишлаб топиш учун Россияга ишлагани кетди. У ерда нима иш қилгани ва қандай қийин кунларни бошдан кечирганини эслагим ҳам келмайди. Ҳамма вилоятлик талабалар сингари ижара уйда яшаганман, баъзан чўнтагимда 10 минг сўм пулим ҳам бўлмаган. Ҳозир кўпчилик “Икки-уч йилда машҳурликка эришдингиз”, дейди. Аслида ижодни бошлаганимга 10 йилдан кўпроқ бўлди, фақат ўзимни мустақил ижодкор сифатида олиб чиқолмаганман, дейди Миржалол Неъматов.
“Театрга ишга олишмаган”
Миржалол Неъматов театрга ишга олинмагани ва ота-онасини алдаб, официантлик қилган кунларини қуйидагича эслайди.
— Шартнома асосида ўқишни тамомлаб, ишга олишар деган умидда Муқимий номидаги мусиқали драма театрига иш сўраб борганман. Аммо турли баҳоналар билан ишга олишмаган. Аслида-ку, у ернинг ойлиги у қадар кўп эмасди, аммо тўрт йил ўқиб, ўз мутахассислигим бўйича ишлолмайманми, деб ачинганман. Дипломим бўйича иш тополмай, официантлик қилишимга тўғри келган. Пулдан қийналиб юрганимни сезган ота-онам “Навоийга қайт, Тошкентда тентираб юрма”, дейишган. Ўшанда официант бўлиб ишлаётганимни айтишга уялиб, “Маданият уйига ишга кирдим, менда ҳаммаси яхши”, деб алдардим, дейди Миржалол Неъматов.
“Пулсизлик сабаб севгим рад этилган”
Айрилиқ ҳақида кўп куйловчи хонанда Миржалол Неъматов пулсизлиги сабаб севгиси рад этилгани ва ҳозир у қиз ҳақида эслашни ҳам истамаслиги ҳақида гапирди.
— Менимча, севги бир томонлама бўлган, агар бундай бўлмаганида, ҳеч қандай сабаб бизни айирмаган бўларди. Шароитим йўқлигини ва қачондир ҳаммаси яхши бўлишини тушунтирганман, аммо рад жавобини берган. Пулсизлигим сабаб севгим ҳам рад этилган. Ҳозир у ҳақида билишни ҳам истамайман. Муҳаббатига содиқ инсонман. Пешанамда бошқа инсон ёзилган экан, у билан оила қурдим, дейди Миржалол Неъматов.
“Мени ҳақорат қилган”
Хонанда Ёрқинхўжа Умаровнинг жамоасида ишлагани ва ундан аччиқ гап эшитган кунини қуйидагича эслайди.
— Бир йилга яқин Ёрқинхўжа Умаровнинг тўй хизматларида иккинчи ҳофиз сифатида ишлаганман. Яъни у чарчаса ва навбатчи тўйимизда “бирров”ларга бориб келиши керак бўлса, мен қўшиқ айтиб турардим. Ёрқинхўжа билан аслида тенгдошмиз, аммо у машҳурликка эришиб бўлганди. У “бирров”га кетса, тўй эгалари “Бунақасига келишмагандик, нега бу бола қўшиқ айтяпти”, деб норози бўлишган пайтлари ҳам бўлган. Ёрқинхўжа жонли куйлагани учун чанқаб қоларди, бу пайтда совуқ сув ичиш мумкин эмас. Унга илиқ қайнатилган сув берардик. Бир тўйда эътиборсизлик қилиб, унга меъёридан иссиқроқ сувни бериб юборганман. Оғзи куйиб, мени ҳақорат қилган. Аммо жамоадан кетишимга бу воқеа сабаб бўлмаган. Жамоа аъзолари билан келишолмай қолганман ва ҳайдалганман, дейди Миржалол Неъматов.
“Эссиз, ўзим ижро этсам бўлар экан”
Миржалол Неъматов хонанда сифатида танилгунига қадар кўп санъаткорларга қўшиқ ёзиб бергани ва Шоҳруххонга сотган қўшиғини ўзи ижро этмаганига афсусланиши ҳақида гапирди.
— Шу кунгача жуда кўп хонандаларга қўшиқ ёзиб берганман. Муниса Ризаева, Райҳон, Зиёда, Шоҳруххон, Юлдуз Турдиева, Дилдора Ниёзова билан доимий ҳамкорлик қилардим. Шоҳруххонга “Юрак” номли қўшиқни ёзиб берганман ва кутилмаганда у машҳурликка эришиб кетган. Ўшанда “Эссиз, ўзим ижро этсам бўлар экан”, деган фикр хаёлимдан ўтган. Аммо насиба деган нарса бор, унинг устига ўша пайтда мустақил қўшиқ ижро этадиган аҳволда эмасдим. Шоҳруххоннинг ёрдамчиси менга 500 АҚШ доллари берган ва ўша пулдан 100 долларини уйга жўнатганман. Бу 23 ёшга кириб оиламга берган илк ёрдамим эди, дейди хонанда.
“Ҳамдам Собиров акангизми?”
Миржалол Неъматов устози Ҳамдам Собиров билан танишуви ва у билан яратилган дуэт тарихи ҳақида гапирди.
— Ҳамдам Собиров билан бир вилоятдан бўлсак ҳам, аввал бир-биримизни танимасдик. Мусиқа басталашим ҳақида эшитиб, мени чақиртирган. Ижодий суҳбат қилганмиз, кейин “Ҳолимга қара” ва “Дарак бер” номли қўшиқларни тайёрлаб берганман. Дуэт айтиш таклифи эса мендан чиққан ва у мухлисларга манзур бўлган. Кўпчилик бизни ака-укага ўхшатади, ҳақиқатан, ижодимиз ҳам, кийиниш услубимиз ҳам бир-бирига ўхшаш. Иккимиз ҳам эркинликни яхши кўрамиз, дейди хонанда.
“Энди қўшиқларимни бошқа хонандаларга бермайман”
Миржалол Неъматов энди бошқа хонандаларга қўшиқ ёзишни истамаслиги ҳақида маълум қилди.
— Илгари мустақил хонанда бўлиб, қўшиқ ва клип яратишга имкониятим бўлмаган. Ҳозир ҳаммаси жойида. Шу боис ўзим яратган қўшиқларни бошқа хонандаларга бермаяпман, дейди хонанда.
Изоҳ (0)