Ўзбекистонда 2025 йил 1 июлдан 11 та давлат хизматлари ва функциялари хусусий секторга ўтказилади. Бу ҳақда “Хизматлар соҳаси барқарор ривожланиши учун қулай шарт-шароитлар яратишга оид қўшимча чора-тадбирлар тўғрисида”ги президент қарорида белгиланди.
Унга кўра, тиббиёт ташкилотларини аккредитациядан ўтказиш ваколати Соғлиқни сақлаш вазирлигидан соҳадаги жамоат бирлашмалари ёки уюшмаларга ўтказилади. Гид-таржимон, экскурсия етакчиси ва йўриқчи-йўл бошловчиларга малака сертификатини бериш Туризм қўмитасидан соҳадаги жамоат бирлашмалари ёки уюшмаларга ўтказилади.
Ҳисоблагичларни қиёслашдан ўтказиш Техник жиҳатдан тартибга солиш агентлигидан аккредитацийдан ўтган тадбиркорлик субъектларига ўтказилади.
Карантин остидаги маҳсулотларни зарарсизлаштириш бўйича фаолият Қишлоқ хўжалиги вазирлиги, Ўсимликлар карантини ва ҳимояси агентлигидан лицензиялаш тартиб-таомилларидан ўтган тадбиркорлик субъектларига берилади.
Якка тартибдаги уй-жойларнинг қурилиш ҳамда реконструкция қилиш ишлари юзасидан назорат юритиш, кичик ҳажмдаги нотурар бино ва иншоотларнинг қурилиши ҳамда реконструкция қилиш ишлари юзасидан назорат юритиш Қурилиш ва уй-жой коммунал хўжалиги вазирлигидан архитектура-шаҳарсозлик ҳужжатларини ишлаб чиқариш фаолияти учун лицензияга эга субъектларга ўтказилади.
Ўзбекистонга олиб кириладиган “М” ва “Н” тоифадаги ғилдиракли янги транспорт воситаларини экологик тоифа талабларига мувофиқлигини экологик сертификатлаш Экология, атроф-муҳитни муҳофаза қилиш ва иқлим вазирлигидан аккредитациядан ўтган тадбиркорлик субъектларига берилади.
Қуйидаги хизматлат Давлат активларини бошқариш агентлигидан соҳадаги жамоат бирлашмалари ёки уюшмаларга ўтказилади:
- риэлторларнинг малака имтиҳонини ўтказиш ва уларга малака сертификатини бериш;
- баҳоловчининг малака имтиҳонини ўтказиш ва уларга малака сертификатини бериш;
- суд бошқарувчиси малака аттестатини бериш;
- баҳоловчиларга тоифалар бериш.
Ўзбекистонда марказий шифохоналарда тиббиёт билан боғлиқ бўлмаган хизматлар ҳам хусусий секторга ўтказилади. Бу ҳақда Шавкат Мирзиёев 28 февраль куни ижтимоий соҳада давлат-хусусий шериклик лойиҳаларини самарали ташкил қилишга оид тақдимот билан танишганида маълум қилинганди. Тақдимотда тиббиёт, таълим, маданият ва спорт йўналишларида давлат-хусусий шерикликни кенгайтириш бўйича таклифлар муҳокама қилинганди. Ҳозирги кунга қадар 43 та маданият маркази хусусий секторга берилган бўлиб, яна қўшимча 127 тасини бериш имконияти аниқланган.
Изоҳ (0)