Ғуломжон Ёқубовни бошқа санъаткорлардан ажратиб турадиган жиҳати — ташқи кўринишига алоҳида урғу қаратишида. Халқ артисти тўй-ҳашам ва концертларда ташқи кўриниши ва нутқига ўзгача эътибор беради. У омма олдида ўзини тутишни билмайдиган, тўй ва тадбирларга майка ва шортикда келадиган қўшиқчилар ҳақида гапирди.
— Баъзи қўшиқчилар тўйга, халқ хизматига борганда “тапочка” ёки кроссовкада боради, майкада ҳам борганларини кўрганман. Одамлар 20-30 йилда бир марта тўй қилади, бор чиройли кийимини ўша куни кийишга ҳаракат қилади. Меҳмонлар ҳам фалончининг тўйи экан деб яхши кийимлар сотиб олади. Ҳайит байрамига тайёрлангандек неча йилда бир бўладиган тўйга ҳам тайёрланиб боришади. Нимага энди артистлар оддий кийим ёки майкада кириб келади? Бу одамларнинг ғашига тегади. Балки бу нарса ёшларга ёқар, лекин ёши сал каттароқларга ёқмайди. Мана буни аҳволини қара дейишади. Саҳнага кўчадаги кийим билан кириб бўлмайди, саҳна муқаддас жой. Ҳиндлар саҳнани бир ўпиб, кейин қадам босган.
Мен кўчада кийган кийимимни ҳеч ким ҳеч қачон саҳнада кўрмаган. Мен ҳар йили, албатта, янги костюм кийишим шарт. Қўшиққа мос кийимни чет элдан бўлса ҳам қидириб топиб, бўлмаса шу ерда тиктириб кияман, халққа кўрсатаман. Эшакка тўқим, одамга либос, деб бекорга айтилмаган.
Санъаткор суҳбатда ҳам, еб-ичишда ҳам, кийинишда ҳам ўрнак бўлиши керак. Тўғри, ҳеч кимни мажбурлай олмаймиз, аммо ёшларга илтимосим шу. Мендан кўриб 10-15 йилдан бери яхши кийиниб чиқаётганлар ҳам бор, мана шуларга раҳмат, дейди халқ артисти.
- Аввалроқ Ғуломжон Ёқубов қўшиқчи набираси, 25 йилдан буён концерт бериши, қўшиқ талашиш онгсиз одамларнинг иши экани ва уни ўлди дея ёлғон хабар тарқатганлар ҳақида “Дарё”га берган интервьюсидан парча эълон қилинган эди.
Изоҳ (0)