Россия президенти Владимир Путин 15 май куни Истанбулда бўлиб ўтадиган тинчлик бўйича музокараларда иштирок этмайди. Сиёсатчи музокараларда қатнашадиган делегация таркибини тасдиқлади. Бу ҳақда Кремль хабар берди.
Рўйхатга Путин киритилмаган, делегация раҳбари этиб Россия президенти ёрдамчиси Владимир Мединский тайинланган. У 2022 йилда Украина ва Россия делегациялари учрашганида Россия томонидан музокаралар гуруҳи раиси бўлган эди. Шунингдек, Истанбулдаги музокараларда ташқи ишлар вазири ўринбосари Михаил Галузин, Россия Қуролли кучлари Бош штаби бош бошқармаси бошлиғи Игор Костюков ва Россия мудофаа вазири ўринбосари Александр Фомин қатнашади.
Ҳужжатда музокаралар учун “экспертлар” рўйхати ҳам кўрсатилган: Россия Бош штаби ахборот бошқармаси бошлиғининг биринчи ўринбосари Александр Зорин; Россия президентининг гуманитар соҳадаги давлат сиёсати бошқармаси бошлиғи ўринбосари Елена Побереевская, Россия Ташқи ишлар вазирлигининг МДҲ мамлакатлари иккинчи департаменти директори Алексей Полишук; Россия Мудофаа вазирлигининг халқаро ҳарбий ҳамкорлик бош бошқармаси бошлиғи ўринбосари Владимир Шевсов.
Путин 15 май куни Истанбулда можаро томонлари иштирокида тўғридан тўғри музокаралар ўтказишни таклиф қилганди. Шундан сўнг АҚШ президенти Дональд Трамп украиналик ҳамкасбини мазкур музокарага рози бўлишга чақирганди.
Бунга жавобан Украина президенти музокараларда шахсан Владимир Путинни кутишини қайд этган. Кремль музокараларда қатнашадиган Россия делегацияси таркибини 14 майгача ошкор қилмаган. Кремлнинг собиқ юқори мартабали амалдори музокараларда Россия номидан Ташқи ишлар вазири Сергей Лавров ва Россия президенти ёрдамчиси Юрий Ушаков иштирок этишини айтганди.
Изоҳ (0)