Қодиров Зеленскийга Украинани қандай қутқариш ҳақида маслаҳат берди

Европа давлатлари етакчилари Украина президенти Владимир Зеленскийни Россия билан музокаралар столига ўтирғизиб қўйиши керак. Бу ҳақда Чеченистон раҳбари Рамзан Қодиров ўз Telegram-каналида ёзди деб хабар беради «РБК».

«Украинани қутқариб қолиш учун Зеленский Ғарб пропагандаси тўсиб қўйган кўзларини очиши ва ўз мамлакатидаги натсизмга нуқта қўйиши керак… Сиз [Yevropa yetakchilari] Путин билан умумий тил топиб, Зеленскийни музокаралар столига ўтирғизишингиз керак, токи у бизнинг барча таклифларимизни имзоласин», — деди у.

Чеченистон раҳбари, шунингдек, «Донецк ва Луганскдаги ишни битиргандан кейин, исталган давлатга қараб йўл олишимиз мумкин» деб огоҳлантирди. «Бутун Россия президентимиз томонда. Ҳатто бундан ҳам кўпроқ нарсани айтишим мумкин: бугун бизга Европа давлатларидан кўплаб кўнгиллилар келмоқда, улар бу шайтонларнинг барчасига қарши курашишга тайёр», — дея қўшимча қилди Қодиров.

Айни пайтда Чеченистон раҳбари Ғарб мамлакатлари Россиядаги «аёллар, болалар, кексалар, мураббийлар, ит ва отлар»га қарши санкциялар киритиш орқали ўз заифлигини кўрсатаётганини айтди.

Аввалроқ Россия ва Украина музокаралар тўхтатилганини маълум қилган эди. «Айни пайтда Москва ва Киев ўртасида тинчлик музокаралари олиб борилмаяпти», — деган эди Россия ташқи ишлар вазири ўринбосари Андрей Руденко. Кейинроқ музокаралардаги паузани Украина президенти офиси раҳбари маслаҳатчиси Михаил Подоляк ҳам тасдиқлади.

Кейинроқ Украина тинчлик музокараларини давом эттириш учун ўз шартини маълум қилди. Москва ва Киев ўртасидаги тинчлик музокаралари Россия қўшинлари Украина ҳудудини тарк этганидан кейингина давом этиши мумкин, дея маълум қилди Украина президенти офиси раҳбари маслаҳатчиси Михаил Подоляк.