АҚШ президенти Дональд Трамп давлат котиби Марко Рубио ва вице-президент Жей Ди Венсни эҳтимолий ворислар қаторида тилга олди. Бу ҳақда у NBC News телеканали эфирида маълум қилди.
Журналистнинг саволига жавоб берар экан, Трамп бу икки сиёсатчи ва яна “10-15-20” киши у кетганидан кейин “Американи яна буюк қиламиз” ҳаракатини бошқариши мумкинлигини айтди.
Трамп ҳозирда АҚШ Демократик партиясида республикачиларнинг ёш авлодига тенг келадиган сиёсатчилар йўқлигини таъкидлади. Бу эса унинг эҳтимолий ворисларини соғлом рақобатдан маҳрум қилишини билдирди.
АҚШ конституциясига кўра, Оқ уйда иккинчи президентлик муддатини ўтаётган Трамп учинчи муддатга номзодини қўйишга ҳақли эмас. Конституциянинг 22-тузатишига биноан, “ҳеч ким президент лавозимига икки мартадан ортиқ сайланиши мумкин эмас”.
Конституцияни ўзгартириш учун Сенат ва Вакиллар палатасининг учдан икки қисмининг овози, шунингдек, штатларнинг тўртдан уч қисми ҳукумати томонидан тасдиқланиши талаб этилади.
Мен саккиз йил ишлаган, икки муддатли президент бўламан. Бу мен учун доимо жуда муҳим бўлган, деди Трамп NBC телеканалининг журналисти Кристен Уэлкерга берган интервьюсида.
Сиёсатчи эҳтимолий учинчи президентлик муддати ҳақидаги гаплари жиддийлигини айтди. У номзод кўрсатиш масаласига ҳали эрта экани, бироқ “кўплаб одамлар” бу қарорни қўллаб-қувватлашини билдирди.
Изоҳ (0)