Apple компанияси АҚШда сотиладиган аксарият iPhone ва бошқа қурилмаларни энди Хитой ишлаб чиқармаслигини маълум қилди. Бунинг сабаби президент Дональд Трампнинг Хитойга қаратилган юқори тарифли божларидир. Бу ҳақда BBC нашри хабар қилди.
“Яқин ойларда АҚШ бозорига йўл оладиган iPhone’ларнинг аксарияти Ҳиндистонда ишлаб чиқарилади. Ветнам эса iPad ва Apple Watch каби маҳсулотларни ишлаб чиқариш бўйича йирик марказ бўлиб қолади,” дейди компания раҳбари Тим Кук.
Компаниянинг тахмин қилишича, АҚШ импорт солиқлари жорий чоракда Apple харажатларига яна тахминан 900 миллион доллар қўшиши мумкин. Лекин Трамп асосий электроникаларни янги тарифлардан озод қилиш ҳақида аввалроқ қарор берган эди.
Трамп маъмурияти шу пайтгача Apple ишлаб чиқаришни Америкага кўчирмоқчи эканини бир неча бор таъкидлаб келган.
1 апрель куни компаниянинг молиявий кўрсаткичларини муҳокама қилиш учун инвесторлар билан учрашув бўлиб ўтди. Унда Apple раҳбари урғуни ўзининг АҚШга киритган сармояларига қаратди.
Жаноб Кукнинг таъкидлашича, компания кейинги тўрт йил ичида АҚШнинг бир қанча штатларига 500 миллиард доллар сармоя киритишни режалаяпти.
“Хитой АҚШдан ташқарида сотиладиган умумий маҳсулотларнинг аксарият қисми учун таъминот ўчоғи бўлиб қолади,” дея қўшимча қилди компания директори.
Трамп маъмурияти компанияларни АҚШда кўпроқ ишлаб чиқаришга ундаш мақсадида Қўшма Штатларга импорт қилинадиган маҳсулотларга божлар жорий этган эди. Шу боисдан Apple акциялари кескин тушиб кетди.
Аммо мамлакат тарифлар кучга кирганидан кўп ўтмай, айрим электроника, жумладан, телефон ва компьютерларни бу божлардан озод этишга мажбур бўлди.
Изоҳ (0)