Украина 23 апрель кунги музокараларда АҚШ таклиф қилган ўт очишни тўхтатиш шартларига рози бўлди. Бу ҳақда президент Дональд Трампнинг Украина масалалари бўйича махсус вакили Кит Келлог маълум қилди. У Fox News телеканалига интервью берди.
Биз Украина жамоаси ва европаликлар билан йиғилиш ўтказдик. Бизда 22 та аниқ шарт бор эди, улар бунга рози бўлди, деди Келлог.
Трампнинг махсус вакилига кўра, гап томонларнинг эгаллаб турган ҳудудлар устидан ҳақиқий назоратини сақлаб қолган ҳолда ўт очишни тўхтатиши ҳақида кетмоқда.
Бундан ташқари, у ҳозирги тўқнашув урушни музлатиш ва 30 кунлик сулҳни бошлашни назарда тутишини айтди. Украина Россиянинг босиб олган ҳудудларининг бир қисми устидан назоратини амалда тан олишга тайёр, бироқ юридик тан олишдан бош тортмоқда. АҚШ эса Украина устидан назоратни қисман қайтариш эвазига де-юре Қрим ва де-факто бошқа ҳудудларни тан олишга рухсат беради.
Улар ўт очишни тўхтатиш режими кучга киргач, ҳар бир томон ўзи эгаллаган позицияларда қолишини тушунади. Улар айнан шунга тайёр. Ўтган ҳафта улар менга бу келишувни аллақачон муҳокама қилишганини айтди. Жорий линияларда ўт очишни тўхтатиш — улар бунга тайёр, деди Трампнинг махсус вакили.
АҚШнинг тинчлик режаси расман эълон қилинмаган, бироқ манбалар уларнинг айримларини ошкор этган. У Россиянинг Қрим устидан юрисдикциясини де-юре, шунингдек, Луганск, Донецк, Херсон ва Запорожье вилоятларининг айрим ҳудудларини де-факто тан олишни назарда тутади.
Шу билан бирга, режа Украина томонига Харьков вилоятининг бир қисмини қайтариш, Запорожье АЭС ва Каховка ГЭС устидан назоратни бериш, Днепр дарёсида эркин ҳаракатланиш ҳуқуқини таъминлаш ҳамда Николаев вилоятидаги Кинбурн қўлтиғи устидан назоратни қайтаришни ҳам ўз ичига олади.
Изоҳ (0)