АҚШ президенти Дональд Трамп 12 февраль куни россиялик ҳамкасби Владимир Путин билан мулоқот қилганди. У бундан сўнг Украина президенти Владимир Зеленский билан ҳам телефон орқали суҳбат қилди.
Сиёсатчилар улар ўртасида бўлиб ўтган телефон суҳбати тафсилотларини маълум қилди.
Биз тинчликка эришиш имкониятлари ҳақида узоқ гаплашдик, жамоа бўлиб бирга ишлашга тайёрлигимиз ва Украинанинг технологик имкониятлари, жумладан, дронлар ва бошқа илғор соҳаларни муҳокама қилдик. Президент Трампдан биргаликда нимага эришишимиз мумкинлигига қизиқиши учун миннатдорман, деди Зеленский.
Украина президентига кўра, Трамп суҳбатда Путин билан нималарни муҳокама қилганини айтган.
Ҳеч ким Украинадан кўра кўпроқ тинчликни хоҳламайди. Қўшма Штатлар билан биргаликда биз Россия агрессиясини тўхтатиш ва барқарор тинчликни таъминлаш устида кейинги қадамларимиз харитасини белгиламоқдамиз. Президент Трамп айтганидек, келинг, буни қилайлик. Биз алоқаларни давом эттиришга келишиб олдик ва бўлажак учрашувларни режалаштирдик, дея қўшимча қилди Зеленский.
Трамп суҳбат ҳақида
Суҳбат тафсилотларини АҚШ президенти Дональд Трамп ҳам ўзининг Truth Social саҳифасида эълон қилди. Унинг сўзларига кўра, “суҳбат жуда яхши ўтди”.
У ҳам президент Путин каби тинчлик ўрнатишни хоҳлайди, деб ёзган Трамп.
АҚШ президенти суҳбат асосан вице-президент Ж.Д.Венс ва Давлат котиби Марко Рубио иштирок этадиган 14 февраль куни Мюнхенда бўлиб ўтадиган учрашув ҳақида бўлганини айтди.
Умид қиламанки, учрашувнинг натижалари ижобий бўлади. Оммавий ва мутлақо керакcиз қурбонлар ва вайронагарчиликларга сабаб бўлган бу бемаъни урушни тўхтатиш вақти келди. Россия ва Украина халқларини ўз паноҳида асрасин!, деди Трамп.
Трамп ва Путин суҳбати
АҚШ президенти россиялик ҳамкасби билан суҳбатни “узоқ давом этган жуда самарали” деб таърифлади. Иккала етакчи ҳам Россия ва Украина можаросида одамлар ўлимини тўхтатиш кераклиги ҳақида келишиб олганини айтди.
Биз, шунингдек, тегишли жамоаларимиз зудлик билан музокараларга киришиши ҳақида келишиб олдик, деди Трамп.
Томонлар, шунингдек, қуйидагиларни муҳокама қилдилар:
- Яқин Шарқ;
- энергетика;
- сунъий интеллект;
- доллар таъсири.
Биз иккимиз ҳам халқларимизнинг буюк тарихи ва Иккинчи жаҳон урушида биргаликда муваффақиятли жанг қилганимиз ҳақида ўйладик, деб ёзган Трамп.
Музокаралар ўтказилганини Кремль ҳам тасдиқлади. Россия президенти матбуот котиби Дмитрий Песковнинг маълум қилишича, давлат раҳбарлари қарийб икки соат суҳбатлашган. Путин Трампни Москвага таклиф қилган.
Россия президенти АҚШ президентини Москвага таклиф қилди ва ўзаро манфаатли иш йўналишлари, жумладан, Украина масаласини ҳал қилиш мавзуси бўйича Америка расмийларини Россияда қабул қилишга тайёрлигини билдирди, дейди Песков.
Изоҳ (0)