Ўзбекистонда қанча янги автобус йўналишлари очилгани очиқланди 

Ўзбекистонда 113 та янги йўналиш, шу жумладан 56 та автобус йўналиши очилгани маълум қилинди. Бу ҳақда Транспорт вазирлиги хабар берди. 

Қайд этилишича, йўловчиларга кўрсатилаётган хизматлар сифатини яхшилаш учун биринчи навбатда ҳаракат таркиби замонавий автобус ва электробуслар билан янгиланмоқда. Мақсад саёҳатларни янада қулайроқ қилиш орқали жамоат транспортидан кундалик фойдаланувчилар сонини оширишдир.

Шу мақсадда 2024 йилнинг ўзида ҳудудларда тадбиркорлар 700 та автобус ва 530 дан ортиқ микроавтобус сотиб олди. 2025 йилнинг январь апрель ойларида эса ҳудудларга яна 241 та автобус ва 133 та микроавтобус олиб келинди.

113 та янги йўналиш, шу жумладан 56 та автобус йўналиши очилди, бу ҳудудлардаги транспорт алоқасини яхшилади.

Вилоят транспорт бошқармаларида марказлаштирилган диспетчерлик хизмати жорий этилди. 48 та йўналиш брутто-шартномалар асосида хизмат кўрсатишга ўтди – бу сифат ва хавфсизликка устуворлик берилган янги моделдир.

Ангренга 15 та Yutong автобуси олиб келинганди. Зоир Мирзаев 2024 йил октябрида ўтказган ҳокимлик соатида Тошкент вилоятида транспорт соҳасидаги хизматларни яхшилаш учун 1000 та янги автобус харид қилиш бўйича топшириқ берганди.

Транспорт вазирлиги матбуот хизматининг билдиришича, ҳудудларда аҳолига кўрсатилаётган транспорт хизматлари сифатини яхшилаш мақсадида замонавий автобусларни олиб келиш ишлари давом этмоқда. Тошкент шаҳрига яна 1000 та Yutong автобусини олиб келиш имкониятлари ўрганилмоқда. Андижон вилоятига Хитойдан 100 та электробус харид қилиниши режалаштирилган.

• Наманганга хориждан яна 30 та янги автобус олиб келинди.
• Гулистон шаҳри учун 12 та янги автобус олиб келинди.