Россия Запорожье атом электр станцияси назоратини АҚШга топширмайди. Россия ташқи ишлар вазири Сергей Лавров бу ҳақда CBS News’га берган интервьюсида маълум қилди.
АҚШ Запорожье АЭС атрофидаги ҳудудларга нейтрал мақом беришни ва уларни ўз назоратига олишни таклиф қилгани ҳақида хабар тарқалганди.
Биз ҳеч қачон бундай таклиф олмаганмиз, агар олсак ҳам, Запорожье АЭС Россиянинг “Росатом” давлат корпорацияси тасарруфида эканини тушунтирамиз. У доимий равишда объектда бўлган МАГАТЭ ходимлари назорати остидадир, деди у.
АҚШ президенти Дональд Трамп март ойида АЭСни бошқаришда Киевга ёрдам таклиф қилганди. Украина раҳбари Владимир Зеленский гап фақат Запорожье атом электр станцияси (ЗАЭС) ҳақида кетаётганини айтган.
Reuters хабарига кўра, Трамп бу масалани Россия президенти Владимир Путин билан муҳокама қилишни режалаштирган. Ушбу ташаббус Украинада ўт очишни тўхтатиш бўйича музокараларнинг бир қисми бўлиши мумкин.
The Wall Street Journal аниқлик киритишича, гап ЗАЭС атрофидаги ҳудудларга нейтрал мақом бериш ва уларни АҚШ назорати остига ўтказиш ҳақида кетмоқда.
АЭС Запорожье вилоятининг Энергодар шаҳрида жойлашган. У 2022 йил 4 мартда Россия томонидан ҳарбий йўл билан эгаллаб олинди ва 2022 йил 5 октябрда Россия уни ўзининг мулки деб эълон қилди. Москва ва Киев мунтазам равишда бир-бирини ЗАЭСга ҳужумларда айблаб келади. Ҳозирда станциядаги барча реакторлар хавфсизлик сабабли совитилган ва ишламаётган ҳолатда сақланмоқда. Завод Россиянинг “Росатом” давлат компанияси ва “Ростехнадзор” назорат органи бошқаруви остида.
Украина ҳукумати Россиянинг бу ҳаракатини ноқонуний деб ҳисоблайди ва станция ҳали ҳам “Энергоатом” давлат компаниясига тегишли эканини таъкидлайди. Украинанинг мазкур компанияси станциянинг техник бошқарувини Киевдаги марказий офис орқали амалга оширишда давом этмоқда.
Изоҳ (0)