Владимир Путин баҳордан буён биринчи марта Олаф Шольц билан телефон орқали суҳбатлашди

Россия президенти Владимир Путин ва Германия канцлери Олаф Шольц телефон орқали суҳбатлашди, деб ёзади Meduza Германия ҳукумати хабарига таяниб.

Суҳбат бир ярим соат давом этди. Томонлар Украинадаги вазиятни, хусусан, Запорожье АЭС хавфсизлиги масаласини муҳокама қилди.

Шольц, Германия ҳукумати хабар беришича, Путинни ўз қўшинларини Украина ҳудудидан тўлиқ олиб кетишга ва вазиятни дипломатик йўл билан тартибга солишга, шунингдек, Қизил Хоч ташкилоти вакилларининг украиналик асирлар билан мулоқотини таъминлашга чақирди.

Кремль, ўз навбатида, Путин «федерал канцлернинг эътиборини Украина томонидан халқаро гуманитар ҳуқуқ қўпол равишда бузилаётганига қаратгани» ва дон бўйича битимга риоя қилиниши зарурлиги, унинг доирасида Россия ўғити экспорти учун тўсиқлар бартараф этилиши кераклигини эслатгани ҳақида хабар берди.

Кремль сайтидаги расмий хабарларга қараганда, Путин ва Шольц 28 майдан буён телефон орқали мулоқот қилмаган. Урушнинг илк уч ойи мобайнида эса улар нақ тўққиз марта қўнғироқлашган (уларнинг баъзиларида Франция президенти Эммануэль Макрон ҳам қатнашган).