Франция президенти Эммануэль Макрон Россия етакчиси Владимир Путин билан телефон орқали суҳбатда Россиянинг Украинадаги амалиётларини тўхтатиш ва музокараларни бошлаш тарафдори эканини маълум қилди. Бу ҳақда Елисей саройи баёнотига таяниб, «Интерфакс» хабар берди.
«У Россиянинг Украинадаги ҳарбий амалиёти давом этишини қоралади ва уни тезроқ тугатиш, музокараларни бошлаш ҳамда Украина суверенитети ва ҳудудий яхлитлигини тиклаш бўйича ўз талабини эслатди», — дейилади баёнотда.
Икки давлат раҳбарларининг 11 сентябрь куни бўлиб ўтган суҳбати якунлари бўйича президент канцелярияси баёнотига кўра, Макрон Россия президентига Запорожье атом электр станцияси хавфсизлигидан хавотирда эканини билдирган. Маълум қилинишича, Франция президенти яқин кунларда президент Путин билан бу мавзуда яна гаплашади.
«Президент Макрон президент Зеленский ва МАГАТЭ бош директори билан алоқаларни давом эттиради. Шунингдек, у яқин кунларда президент Путин билан Запорожье АЭС хавфсизлигини кафолатловчи келишувга эришиш учун янги суҳбат ўтказади», — дейилади хабарда.
Елисей саройи маълумотларига кўра, суҳбат чоғида Макрон Истанбул дон келишуви мавзусини ҳам кўтарган ва «келишув бўйича экспорт қилинадиган дон ҳақиқатан ҳам унга энг муҳтож бўлганларга етиб боришини» таъминлашга чақирган.
Макрон Европа Иттифоқининг санкциялари Россия қишлоқ хўжалиги маҳсулотларини экспорт қилишга тўсқинлик қилмаслигига ишонтирган.
Аввалроқ Кремль матбуот хизмати ҳам Путин ва Макрон ўртасидаги телефон суҳбати ҳақида хабар берган эди. Унда «Украинадаги вазият бўйича батафсил ва очиқ фикр алмашилгани, бунда асосий эътибор Запорожье АЭС хавфсизлигини таъминлашга қаратилгани» ҳақида айтилган.
Изоҳ (0)