11 сентябрга ўтар кечаси Запорожье АЭС нинг сўнгги — олтинчи энергоблоки электр тармоғидан узилди ва совуқ ҳолатга ўтказишга тайёрлана бошлади. Бу ҳақда Украинадаги барча атом электр станцияларини бошқарадиган «Энергоатом» компанияси хабарида айтилади.
Компаниянинг таъкидлашича, сўнгги уч кун давомида олтинчи энергия блоки ЗАЭСда ўз эҳтиёжларини «ўта паст қувват даражасида» таъминлаб келаётганди. «Энергоатам» буни «Россиянинг ўққа тутиши оқибатида» станция Украина энергетика тизими билан боғлайдиган электр тармоғидан узилгани билан изоҳлади.
10 сентябрь оқшомида шикастланган электр узатиш линияларидан бири тикланган ва АЭС Украина энергетика тизимига қайта уланган. «6-энергоблокни ўчириб, уни энг хавфсиз – совуқ ҳолатга ўтказишга қарор қилинди», — дейилади «Энергоатом» хабарида.
Россиянинг «Росэнергоатом» концерни раҳбари маслаҳатчиси Ренат Карчаа ҳам 11 сентябрга ўтар кечаси АЭСнинг олтинчи энергия блоки иши тўхтатилганини айтди, деб ёзади «Интерфакс».
Украина ва Европадаги энг йирик атом электр станцияси бўлган Запорожье АЭС Россия қўшинлари томонидан босиб олинган Запорожье вилоятининг Энергодар шаҳрида жойлашган. Украина ва Россия бир неча бор бир-бирини станцияни ўққа тутишда айблаган.
Изоҳ (0)