Запорожье атом электр станцияси (ЗАЭС) ҳудуди демилитаризация қилиниши ва у ердан қарама-қарши кучларнинг барчаси олиб чиқилиши керак. БМТ Бош Ассамблеясининг 77-сессияси президенти Чаба Креши шундай мурожаат билан чиқди.
«Запорожье АЭС ҳақида гапирсак, бу ядро хавфсизлигининг жиддий муаммоси. Барча томонлардан сўрашимиз мумкин бўлган энг яхши чора — бу АЭСни демилитаризация қилиш, қўшинларни олиб чиқиш ва станция ҳудудига ҳеч қандай ҳарбий операция таъсир қилмаслигини таъминлаш, деб ҳисоблайман», — деди у.
Керешининг фикрича, бу қарор барча давлатлар, жумладан, Россия ва Украина учун ҳам яхши вариант бўлади.
Украинаинг Энергодар шаҳрида жойлашган Запорожье АЭС Россия қўшинлари назорати остида. Сўнгги пайтларда у доимий равишда ўққа тутилмоқда. Россия ва Украина томонлари ҳужумда бир-бирини айбламоқда.
Аввалроқ Атом энергияси бўйича халқаро агентлик (МАГАТЭ) Украинанинг ядровий хавфсизлиги тўғрисида 52 бетли ҳисобот эълон қилган эди. Агентлик ЗАЭСнинг ўққа тутилиши Украина учун ҳам, қўшни давлатлар учун ҳам мисли кўрилмаган оқибатларга олиб келиши мумкинлигини таъкидлаб, зудлик билан станция атрофида хавфсиз ҳудуд яратишга чақирган.
Ҳисоботда асосий эътибор ўққа тутишлар оқибатида станцияга етказилган жисмоний зарарга қаратилган. Хусусан, миссия маълумотларига кўра, янги ва ишлатилган ядро ёнилғисини сақлайдиган бинолар, шунингдек, станцияни жисмонан ҳимоя қилишга мўлжалланган авария тизими мавжуд бино шикастланган.
1 сентябрь куни МАГАТЭ миссияси Запорожье АЭСга келган эди. Ташриф давомида агентлик инспекторлари станциядаги вайронагарчиликни баҳолаши, хавфсизлик тизимларининг қандай ишлашини аниқлаши, шунингдек, ходимларнинг иш шароитлари билан танишиши керак эди. Гуруҳ станцияда тахминан тўрт соат бўлди, шундан сўнг МАГАТЭ бош директори Рафаэл Гросси бошчилигидаги экспертларнинг бир қисми АЭС ҳудудини тарк этди. Ҳозир МАГАТЭнинг икки ходими ЗАЭСда кузатувчи сифатида қолмоқда.
Изоҳ (0)