Чехия парламенти Депутатлар палатасининг Ташқи ишлар қўмитаси 3 ноябрь, пайшанба куни Россия ҳукуматини террорчи режим деб тан олди. Бу ҳақда Cheske Noviny chex нашри хабар берди.
«Ташқи ишлар қўмитаси Европа Кенгаши Парламент Ассамблеясининг резолюциясига мувофиқ Россиянинг амалдаги режимини террорчи режим деб тан олади», — дейилади тегишли резолюцияда.
Ҳужжатда Россиянинг Украинага қарши агрессияси: тинч аҳолига, фуқаролик объектларига ва асосий инфратузилмага ҳужумлари қораланади.
«Запорожье атом электр станциясининг ўққа тутилиши ва АЭС ҳудудига ҳарбий қисмларнинг жойлаштирилиши Украина ҳудудларидаги тинч аҳоли учун таҳдиддир. Ядро қуролидан фойдаланишга оид тўғридан-тўғри ёки билвосита таҳдидлар, шунингдек, Украинани оммавий қирғин қуролини қўллашни режалаштирганликда ёлғон ва асоссиз айблаш тарангликнинг кучайиши ва Европа хавфсизлигига таҳдиддир», — дейилади резолюцияда.
Европарламент депутатлари Россия армиясининг ҳаракатлари ҳарбий жиноятлар ва инсониятга қарши жиноятлар белгиларига мос келишини ва айбдорлар жазоланиши кераклигини айтди.
Қўмита Чехия ташқи ишлар вазири Ян Липавскийнинг Россия ҳарбий агрессиясига алоқадор барча шахслар учун махсус трибунал яратиш бўйича саъй-ҳаракатларини қўллаб-қувватлади.
Чехия Россияни террорчи режим деб эълон қилган учинчи давлат бўлди. Аввал Эстония ва Польша тегишли резолюцияларни қабул қилганди.
Изоҳ (0)