Атом энергияси бўйича халқаро агентлик (МАГАТЭ) бошқарувчилар кенгаши резолюция қабул қилиб, унда Россияни Запорожье атом электр станциясидан ҳарбий ва бошқа ходимларини зудлик билан олиб чиқишга чақирди.
Резолюция муаллифлари Россияни станцияга эгалик бўйича асоссиз даъволардан воз кечишга ва унинг хавфсизлигини таъминлаш учун Украина томонининг ЗАЭСга кириб, станция устидан назоратни тиклашига рухсат беришга чақирди.
Ҳужжатда, шунингдек, станциянинг украиналик ходимларига нисбатан босимдан, АЭС ўққа тутилиши оқибатида ташқи электр таъминотидаги узилишлар ва Россиянинг Украина ядровий объектларида «фаолиятини тўхтатиш» ҳақидаги аввалги чақириқларга қулоқ солмаганидан хавотир билдирилган.
Reuters хабарига кўра, бу МАГАТЭнинг Украинада уруш бошланганидан бери Россияни Украина ядровий иншоотларида ҳарбий ҳаракатларни тўхтатишга чақирувчи учинчи резолюцияси. Янги ҳужжат ёпиқ овоз беришда кенгаш таркибига кирувчи 35 давлатдан 24 тасининг вакиллари томонидан қўллаб-қувватланган. Яна етти киши қарши овоз берган. Reuters манбаларига кўра, улар орасида Россия ва Хитой бор.
Россиянинг Венадаги халқаро ташкилотлардаги доимий ваколатхонаси резолюцияни шарҳлар экан, МАГАТЭни ўз фаолиятини «сиёсийлаштириш»да айблади. Россия дипломатлари ҳужжатни «нопрофессионал» ва «хатолардан иборат» деб атади.
Запорожье атом электр станцияси Россия Украинага бостириб кирганидан кўп ўтмай рус ҳарбийлари қўлига ўтганди. Ўшандан бери станция бир неча бор ўққа тутилган, бунда Россия ва Украина бир-бирини айблаган. Россия ЗАЭС ҳудудига ҳарбий техникани жойлаштириш бўйича бир неча бор айбланган. МАГАТЭ станцияга ташрифи ортидан атом электр станцияси атрофида хавфсиз ҳудуд яратишга чақирган.
Изоҳ (0)