Россия кучлари 11 август куни Запорожье АЭСга ҳужум қилган. Бу ҳақда Украина президенти Зеленский берган маълумотга асосланиб, Reuters нашри хабар берди.
Манбада айтилишича, фронт назорат чизиғи атрофида жойлашган украин бўлинмалари ҳужумни қайд этган. Фавқулодда ҳолат хавфи юзага келгач, Киевдаги ҳукуматга бу ҳақида хабар етказилган.
Владимир Зеленский АЭС ҳудудидаги миноралардан биридан тутун чиқаётгани акс этган видеони Telegram тармоғидаги каналига жойлаштирган. Унинг сўзларига кўра, станцияда ҳозирда радиация кўрсаткичлари нормал. Россияни “шантаж уюштириш” учун станцияга ҳужум қилгани айтилган.
“Рус босқинчилари Запорожье АЭСга ҳужум уюштириши оқибатида ёнғин чиқди.
Ҳозирги вақтда радиация кўрсаткичлари нормал. Аммо россиялик террорчилар атом станцияси устидан назоратни ўз қўлида ушлаб турса, вазият оғир томонга ўзгариши ҳам мумкин. Запорожье АЭС тортиб олинган биринчи кундан бошлаб Россия ундан Украина, бутун Европа ва дунёни шантаж қилиш учун фойдаланиб келмоқда.
Биз дунёнинг реакциясини кутамиз, МАГАТЕнинг жавобини кутамиз. Бунинг учун Россия жавобгар бўлиши керак. Запорожье станцияси устидан фақат Украина назорати ўрнатилишигина АЭСда нормал ҳолатга қайтиш ва тўлиқ хавфсизликни кафолатлай олади”, деган Зеленский ҳолатга муносабат билдириб.
Запорожьенинг босиб олинган қисмларини назорат қилиш учун Россия томонидан тайинланган расмий Евгений Балицкий АЭСга ҳужумда Украинани айблаган. Украин махсус бўлинмалари Энергодар шаҳри ва унинг атрофидаги саноат тузилмаларига ҳам зарба бергани айтилган.
Зеленский халқаро ҳамжамиятни Россияга нисбатан чоралар кўришга чақирган. АЭС ҳалокати минтақа учун хавфли бўлиши мумкинлиги таъкидланган.
Изоҳ (0)