Россиянинг 23 ноябрдаги ракета зарбалари оқибатида Украинада атом электр станцияларининг (АЭС) асосий электр таъминоти узилди, улар авария ҳолатига ўтказилди. Бундай ҳужумларнинг яна амалга оширилиши ядровий фалокатга олиб келиши мумкин, деб ёзмоқда The Guardian.
Украина «Энергоатом» президенти Петр Котиннинг сўзларига кўра, 23 ноябрь Россиянинг ракета ҳужумлари вақтида Украина АЭСнинг барча хавфсизлик механизмлари тўғри ишлаган, бироқ иккита генератор шикастланган. Оқибатда иккита реакторни қайта ишга тушириш кечиккан. Россиянинг янги ракета зарбалари АЭСга жиддий зарар етказиши мумкин, бу эса Украинанинг энергия таъминоти ва эҳтимол ядро хавфсизлигига жиддий таъсир кўрсатади.
Европанинг энг йирик атом электр станцияси, Запорожье АЭС, март ойида Россия қўшинлари томонидан эгаллаб олинганди, сентябрда эса станция атрофидаги ҳудудларнинг тез-тез ўққа тутилиши сабабли фаолияти тўхтатилганди. Украинадаги яна учта атом электр станциялари, Ривне, Жанубий Украина ва Хмелницкий, яқинда Россиянинг Украина берган ракета ҳужумининг билвосита нишонига айланган.
Шу билан бирга, юқори волтли электр узатиш линиялари, трансформаторлар ва подстанцияларга ракета ҳужумлари барча АЭСнинг бир вақтнинг ўзида биринчи марта фавқулодда тўхтаб қолишига олиб келган.
Атом энергияси бўйича халқаро агентлик (МАГАТЭ) бош директори Рафаэл Мариано Гроссининг сўзларига кўра, Украина АЭСнинг ташқи энергия таъминоти тўлиқ ва бир вақтнинг ўзида узилиши Украинадаги ядро хавфсизлиги билан боғлиқ вазият тобора беқарор ва потенциал хавфли бўлиб бораётганини кўрсатади. Мутахассислар АЭСнинг тез-тез фавқулодда тўхтаб қолиши станцияларда аварияларга олиб келиши мумкинлигини прогноз қилган.
МАГАТЭ Россияни Запорожье АЭСдан чиқиб кетишга чақирувчи резолюция қабул қилганди. Шунингдек, агентлик Украинадаги Чернобил ва бошқа АЭСларни текшириш учун миссия юборишини маълум қилган.
Изоҳ (0)