Атом энергияси бўйича халқаро агентлик (МАGATE) экспертлари россиялик ҳарбийлар томонидан эгаллаб турилган Запорожье атом электр станцияси яқинида портлашларни қайд этди. Бу ҳақда Украина ядровий тартибга солиш давлат инспекцияси раҳбари Олег Кориков маълум қилди.
Унинг сўзларига кўра, Запорожье АЭСда доимий бўлиб турган МАГАТЭ вакиллари 26 ва 27 июль кунлари портлашларни қайд этган.
Аввалроқ МАГАТЭ матбуот хизмати ташкилот мутахассислари 23 июль куни ЗАЭСни текшириш чоғида станциянинг ички ва ташқи периметрлари орасидаги буфер зонада жойлашган бир нечта миналарни кўргани ҳақида хабар берганди. Миналар станция ходимлари кира олмайдиган ёпиқ ҳудудда жойлашган.
Россия Украинага қарши урушнинг дастлабки кунларида ЗАЭСни эгаллаб олганди. 2023 йил июль ойи бошида Украина ҳукумати Россия кучлари АESда провокация тайёрлаётганини эълон қилди. Россия томони, ўз навбатида, Украина қўшинлари 5 июлга ўтар кечаси станцияга ҳужум қилишга ҳозирлик кўраётганини даъво қилди. Кўрсатилган вақтда АЭСда ҳеч қандай ҳодиса қайд этилмаган, АЭСнинг сунъий йўлдошдан олинган суратларида 4-энергоблок томида 5 июлга ўтар кечаси пайдо бўлган номаълум объектлар кўринди.
24 июль куни ЗАЭСнинг 4-энергоблоки аварияга олиб келувчи “қайноқ ўчириш” ҳолатига ўтгани маълум бўлди. Украинанинг “Энергоатом” давлат компанияси ҳодисани “ушбу ядровий иншоотни ишлатиш лицензияси талабларини қўпол равишда бузиш” деб атади, шунингдек, МАGATEни Россия ҳарбийларига таъсир ўтказувчи чораларни кўришга чақирди.
Изоҳ (0)