Украина президенти Владимир Зеленский 25 июнь куни Страсбургда “Путин учун трибунал” яратиш бўйича келишувни имзолади. У “Россиянинг барча ҳарбий жиноятчилари, жумладан, Путин ҳам” суд олдида жавоб беришини айтди. Бу ҳақда BBC хабар берди.
Трибунал ташкил этиш бўйича келишув — ҳали бошланиши. Энди ҳаммаси ишлаши учун реал қадамлар қўйишимиз керак. Ҳар бир россиялик ҳарбий жиноятчи, жумладан Путин ҳам суд олдида жавоб беришини таъминлаш учун кучли сиёсий ҳамкорлик керак, деди у.
Украина президенти Россия устидан ғалаба қозониш учун кураш тўхтамаслигини қайд этди.
Баъзилар трибунал амалда нимага қодир, фақат қурол-яроғ, технологиялар ва дронларга эътибор қаратиш афзалроқ эмасми, деб сўрашади. Шубҳасиз, Украинани ҳарбий жиҳатдан қўллаб-қувватлаш, Россияга нисбатан қатъий санкциялар ва сиёсий босим ўтказиш ниҳоятда муҳим.
Айнан шу нарса Россияга урушнинг ҳақиқий қийматини ҳис қилдиради. Ҳа, босқинчи мағлуб бўлиши керак, биз бунга эришиш учун ҳаракат қилмоқдамиз. Украиналикларнинг ҳаёти ҳимоя қилиниши шарт. Мудофаамизни қўллаб-қувватлаётган барчага миннатдорчилик билдираман, деди у.
Зеленский одил судловнинг аҳамиятига ҳам тўхталди. Унга кўра, одил судлов шундай ишлаши керакки, ҳарбий жиноятчилар Европада ҳам, бошқа ҳеч қаерда ҳам яшириниш учун жой топа олмасин.
Одил судлов шундай ишлаши керакки, бундай тажовузкор жиноятларни режалаштираётганларнинг барчаси жавобгарликка тортилишини аниқ билсин. Одил судлов шундай ишлаши керакки, тажовузкорликнинг ҳеч қандай кўринишига йўл қўйилмайдиган ҳуқуқий тамойил ўрнатилсин.
Шунинг учун ҳам агрессия жинояти қайд этилиши, қораланиши ва жазоланиши шарт. Гаага бунинг учун энг мақбул жой. Гаага одил судловнинг амалга оширилишини кутмоқда, дея таъкидлади президент.
Изоҳ (0)