Суданнинг тезкор ҳаракатланувчи ҳарбийлашган кучлари (RSF) Шимолий Кордофан штатида уюштирган ҳужумлар оқибатида қарийб 300 киши ҳалок бўлди. Бу ҳақда маҳаллий фаолларга таяниб The Guardian хабар берди.
RSF 2023 йил апрель ойидан буён Судан армиясига қарши жанг қилмоқда. Ҳужумга учраган ҳудуд эса фуқаролар урушининг асосий фронтларидан бири ҳисобланади. 12 июль куни RSF Бара шаҳри атрофидаги бир нечта қишлоққа ҳужум қилган.
Шаг Алном қишлоғида 200 дан ортиқ одам ўт қўйиш ёки ўққа тутилиш оқибатида ҳалок бўлган. Бошқа қишлоқларда амалга оширилган талончилик рейдлари давомида эса яна 38 нафар тинч аҳоли ўлдирилган, ўнлаб кишилар бедарак йўқолган.
Жаҳон соғлиқни сақлаш ташкилотига кўра, Судандаги шифохоналардан бирига уюштирилган ҳужумда 40 дан ортиқ тинч фуқаро ҳалок бўлган. 13 июль куни эса Ҳилат Ҳамид қишлоғига қилинган навбатдаги ҳужумда 46 киши, жумладан, ҳомиладор аёллар ва болалар қурбон бўлган. БМТ маълумотларига кўра, бу ҳужумлар оқибатида 3400 дан ортиқ одам ўз уйини тарк этишга мажбур бўлган.
Фавқулодда ҳуқуқшунослар (Emergency Lawеrs) ташкилотининг билдиришича, ҳужумга учраган қишлоқларда ҳарбий объект йўқлиги аниқланган.
Бу эса халқаро гуманитар ҳуқуқ нормаларини бутунлай менсимасдан, содир этилган жиноятларнинг қасддан уюштирилганини кўрсатади, дейди ташкилот.
Судан армияси ҳозирда мамлакатнинг марказий ва шарқий қисмини қатъий назорат остида ушлаб турибди. RSF эса ғарбий ҳудудлар, хусусан, Шимолий Кордофан устидан тўлиқ назорат ўрнатишга ҳаракат қилмоқда.
АҚШ ва бир қатор инсон ҳуқуқлари ташкилотлари RSFʼни уруш жиноятлари, инсониятга қарши жиноятлар ва геноцидда айблаб келмоқда. РСФ раҳбарияти эса бундай ҳаракатларда айбдор деб топилганларни жавобгарликка тортишга ваъда берган.
Судандаги фуқаролар уруши дунёдаги энг йирик гуманитар инқирозлардан бирига айланган. Аҳолининг ярмидан кўпи очликка юз тутган, мамлакат бўйлаб вабо каби юқумли касалликлар кенг тарқалган. Халқаро ёрдам маблағларининг қисқариши эса бу инқирозга жавоб бериш имкониятларини кескин чеклаб қўймоқда.
Изоҳ (0)