Ўзбекистон ва Шарқий Африкада жойлашган Эритрея ўртасида дипломатик муносабатлар ўрнатилди.
Эритреянинг БМТдаги (Нью Йорк) доимий ваколатхонасининг маълум қилишича, 11 июль куни Ўзбекистон ва Эритрея ўртасида дипломатик муносабатлар ўрнатиш тўғрисидаги қўшма коммюнике имзоланди.
Ҳужжатни икки давлат ҳукуматлари номидан Ўзбекистоннинг БМТдаги доимий вакили Улуғбек Лапасов ҳамда Эритреянинг БМТдаги доимий вакили София Тесфамариам Йоханнес имзолаган.
Эритрея — Африканинг шимоли-шарқида, Қизил денгиз бўйида жойлашган давлат бўлиб, Судан, Эфиопия ва Жибути билан чегарадош.
Ушбу мамлакат Ўзбекистон расмий давлатлараро муносабатлар ўрнатган 161-давлат бўлди. Ғарбий Африка мамлакати — Кот-д’Ивуар Ўзбекистон билан дипломатик муносабатлар ўрнатган 160-давлат бўлганди. Ундан аввал Науру, Суринам, Сомали давлатлари билан дипломатик муносабатлар ўрнатилганди.
Изоҳ (0)