Суданнинг шимоли-шарқида олтин кони қулаши оқибатида 50 киши ҳалок бўлиб, 7 киши жароҳат олди. Бу ҳақда Anadolu хабар берди.
Нил дарёси штатидаги Ҳувайд чўлида жойлашган шахта 28 июнь куни қулаб тушган. Гувоҳларнинг айтишича, конда ишлаётганлар катта ҳажмли қум ва тошлар остида қолган. Яна 7 нафар ишчи тан жароҳати олиб, шифохонага ётқизилган. Аввалроқ кондаги ишлар ҳаёт учун катта хавф туғдириши сабабли унинг фаолияти тўхтатилган эди.
Қутқарув ишларига техника ва профессионал қутқарув гуруҳларининг йўқлиги тўсқинлик қилмоқда. Бу эса вайроналар остидан ўнлаб жасадларни олиб чиқишни секинлаштирмоқда. Бу конда икки ой олдин ҳам шунга ўхшаш бахтсиз ҳодиса содир бўлиб, одамлар жароҳат олганди. Фожиа сабаб ҳукуматнинг заиф назорати устидан танқидлар кучайган.
Африка қитъасида Судан учинчи йирик олтин қазиб олувчи мамлакат саналади. Аммо ҳудуддаги қазиб олиш ҳажми жуда кичик. Йирик саноат корхоналаридан фарқли ўлароқ, бу конларда хавфсизлик чоралари йўқ. Уларда кўпинча турли касалликларни келтириб чиқарадиган хавфли кимёвий моддалардан фойдаланилади.
Мамлакатда кон ўпирилишлари ҳам тез-тез учраб туради. Шунга ўхшаш ҳодисада 2023 йил 14 нафар ишчи ҳалок бўлган эди. 2021 йилда эса 38 киши конда тупроқ босиб қолиши оқибатида қурбон бўлган.
Изоҳ (0)