Суданда ҳукумат душмани ҳисобланган “Тезкор ёрдам кучлари” дрон ҳужумларини кучайтирди. Бу ҳақда BBC хабар берди.
Мамлакат армияси пойтахт Хартумни қайтариб олганидан бир неча ҳафта ўтгач, “Тезкор ёрдам кучлари” (ТЁК) Порт-Суданга ва пойтахтга мисли кўрилмаган дрон зарбалари бера бошлаган. Уч йилдан буён давом этаётган можарода дронларнинг роли тобора ортиб бормоқда.
Пойтахтдаги ҳужумлар электр таъминотидаги узилишларга сабаб бўлган. Шаҳар аҳолиси сув танқислигига дучор бўлган. Сўнгги ойларда ҳарбийлаштирилган кучлар тўғонлар ва электр станциялари ва мамлакатдаги ягона аэропорт каби муҳим фуқаролик инфратузилмасига дрон ҳужумларини кучайтирган.
Афтидан, ТЁК армиянинг таъминот линияларини бузишга уринмоқда. Хартумдаги дрон ҳужумлари ва гуманитар хабга қилинган тажовузлар ТЁКнинг қатъийлиги ва катта ҳудудий йўқотишларга қарамай, жангни давом эттиришга қодир эканлигидан далолат беради,” деб ёзган BBC.
Уруш Судан Қуролли Кучлари ва ТЁК ўртасида ҳокимият учун кураш сифатида бошланган. Кейинчалик бошқа Судан қуролли гуруҳлари ва хорижликлар ҳам урушга аралашган. БМТ буни “дунёдаги энг ёмон гуманитар инқироз” деб атаган.
“ТЁК таъсир кўрсата олиш учун Порт-Суданга қуруқлик орқали бориш шарт эмаслигини кўрсатишга ҳаракат қилмоқда”, деди суданлик сиёсатшунос Холод Хайр.
“Хартумни қайтариб олишингиз мумкин, лекин уни ҳеч қачон бошқара олмайсиз. Порт-Суданга эга бўлишингиз мумкин, лекин уни ҳам бошқара олмайсиз. Чунки биз бошқариб бўлмайдиган хавфсизлик инқирози келтириб чиқардик. Биз тугади демагунимизча уруш тугамайди,” деган ТЁК.
Баъзи экспертлар ТЁКнинг Порт-Суданни бомбардимон қилишини қасос сифатида кўрмоқда.
Судан армияси Бирлашган Араб Амирликларини ТЁКни дронлар билан таъминлашда айблаган. Оқибатда Абу Даби билан дипломатик алоқалар узилган. БАА эса айбловларни қатъиян рад этган.
Изоҳ (0)