Россиянинг Санк Петербург шаҳрида 28 ёшли ўзбекистонлик ишчи томдан тушиб кетиши оқибатида ҳалок бўлди. Россия Тергов қўмитаси ҳолат юзасидан жиноий иш қўзғатди.
Маълум қилинишича, 23 май куни Коломенская кўчасидаги кўп қаватли уй томида ишлаётган Ўзбекистон фуқароси баландликдан тушиб кетган. У автомобиль устига тушиб, боши ва умуртқа поғонасидан оғир жароҳат олган. Воқеа жойига етиб келган тез ёрдам ходимлари унинг вафот этганини аниқлаган.
Марҳум “Инженерик” компаниясида том ёпиш ишларини олиб борган. Тергов маълумотларига кўра, у хавфсизлик мосламаларини нотўғри маҳкамлаб, беш қаватли уйнинг томидан тушиб кетган. Марҳумнинг жасади суд-тиббий экспертизасига юборилган.
Тергов қўмитаси Россия Жиноят кодексининг 216-моддаси 2-қисми (эҳтиётсизлик оқибатида одам ўлимига олиб келган ҳолда хавфсизлик қоидаларини бузиш) бўйича жиноят иши очган. Ўзбекистон фуқароси таъмирлаш ишларига керакли хавфсизлик воситаларисиз (анкер линияси ва ҳимоя жакетисиз) жалб этилгани айтилмоқда. Ҳозирда воқеа тафсилотлари ўрганилмоқда.
Изоҳ (0)