“ЦСКА” ярим ҳимоячиси Аббосбек Файзуллаев Россия Премьер Лигасининг якунланган мавсуми бўйича ўз фикрлари билан ўртоқлашди. Бу ҳақда Championat нашри хабар берди.
Файзуллаевнинг айтишича, “армиячилар” турнир жадвалида учинчи ўринни эгаллашга тўлиқ ҳақли бўлган.
Менимча, жамоа мавсумнинг иккинчи ярмида жуда яхши ўйин кўрсатди. Иккинчи даврани мағлубиятсиз якунладик, шунинг учун биз медалларга муносиб эдик. Ўтган мавсум биз учун муваффақиятсиз тугагани боис, бу медал мен учун жуда қадрли. Энди олдинда яна бир муҳим ўйинимиз бор — Россия Кубоги суперфинали. Ҳозирча бутун диққатимиз ана шу беллашувга қаратилган, дейди Файзуллаев.
Эслатиб ўтамиз, 2024/25 йилги мавсум якунларига кўра, “Краснодар” Россия чемпионига айланди. Иккинчи ўринни “Зенит” эгаллаган бўлса, “ЦСКА” кучли учликка якун ясади. “Факел” ва “Оренбург” тўғридан-тўғри РПЛни тарк этди, “Ахмат” ҳамда “Пари НН” жамоалари плей-офф босқичида ўйнайди.
Маълумот учун, “ЦСКА” 1 июнь куни Россия Кубоги суперфиналида “Ростов”га қарши майдонга тушади.
Изоҳ (0)