Россия Премер Лигасининг 2024/25 йилги мавсуми 29-туридан ўрин олган сўнгги учрашув бўлиб ўтди. Москванинг “RJD Арена” стадионида “Локомотив” ҳамда “ЦСКА” жамоалари майдонга тушиб, 2:2 ҳисобида дуранг ўйнади.
Ўйиннинг 10-дақиқасида “Локомотив” ҳужумчиси Дмитрий Воробёв ҳисобни очди. У вингер Сергей Пиняевнинг қанотдан берган аниқ узатмасидан кейин бош билан гол урди.
25-дақиқада Воробёв дублга эришди. Бу сафар у “ЦСКА” ярим ҳимоячиси Аббосбек Файзуллаевнинг ортга берган ноаниқ пасидан кейин тўпни эгаллаб олиб, ҳисобни 2:0 кўринишига келтириб қўйди.
Иккинчи бўлим бошида, аниқроғи 47-дақиқада, “ЦСКА” ҳужумчиси Сауль Гуарирапа бош билан гол уриб ҳисобни қисқартирди. 80-дақиқада эса ярим ҳимоячи Матвей Кисляк узоқ масофадан йўллаган зарбаси билан таблодаги натижани 2:2 кўринишига келтириб қўйди.
Мазкур натижадан сўнг “ЦСКА” 56 очко жамғарган ҳолда турнир жадвалининг 3-ўрнини эгаллаб турибди. “Локомотив” эса 50 очко билан 6-поғонани банд этган.
Маълумот учун, Файзуллаев ўйинга 21-дақиқада захирадан қўшилди. У жароҳат олган Кристиан Бистровичнинг ўрнини эгаллаган эди.
Изоҳ (0)