Баъзида узоқ сафарга боришдан бош тортамиз, чунки бу жараён қанча асаб ва куч талаб қилишини олдиндан биламиз. Ахир йўлга тайёргарлик кўришнинг ўзи бир дард — чамадонга сиғмай қоладиган буюмлар, аэропортдаги ноқулай ҳолатлар, меҳмонхонада унутиб қолдирилган буюмлар. Аммо хавотирга ўрин йўқ. Бу каби муаммоларнинг олдини олишга ёрдам берадиган оддий, аммо фойдали усуллар бор.
Қурилмага скотч ёки изоляция лентаси ёпиштириш ўғриларни чалғитади
Агар сиз саёҳатда қимматбаҳо фотоаппарат ёки электроника олиб юрган бўлсангиз, уларга скотч ёрдамида “сохта” ямоқ ёпиштириб қўйинг. Бу усул билан уларни шикастланган ёки бузилган қурилма сифатида кўрсатиш мумкин. Эҳтимол, ўғрилар бундай “бузилган” буюмга қизиқмай, ундан воз кечади.
Саёҳатда шляпанинг фойдали жиҳатлари
Биринчидан, у сизни оломон ичида ажратиб туради. Масалан, аэропортда кимдир сизни кутаётган бўлса, олдиндан “Мен кўк шляпада бўламан” деб айтсангиз, топиш осон бўлади. Иккинчидан, аэропортдаги текширув вақтида чўнтагингиздаги нарсаларни вақтинча шляпага солиб қўйиш қулай. Учинчидан, меҳмонхонада соат, зирак каби майда буюмларни айнан шляпада сақлаш мумкин. Ниҳоят, уни кафедаги стул ёки пляждаги дам олиш ўриндиғига қўйиб, ўша жой банд эканини билдиришингиз мумкин.
Суюқ бўлмаган шампунга ҳеч қандай шикоят бўлмайди
Ҳозирда шампун ва кондиционерни қаттиқ шаклда, яъни блок кўринишида харид қилиш мумкин. Бундай шаклда уларни бутунлай олиб ўтиш осон бўлади, айниқса, хавфсизлик назоратидан ўтишда 100 мл дан ортиқ идишларни қолдириш талаб қилинадиган жойларда. Бу айниқса, фақат қўл юки билан учаётганлар учун қулай. Бундан ташқари, бошқа афзалликлари ҳам бор: йўловчи шампунсиз қолмайди, суюқлик йўл сумкасида сочилиб кетмайди. Шунингдек, суюқ бўлмаган шампун узоқ вақт хизмат қилади.
Буюмларни махсус тартибда жойлаштириш маъқул
Саёҳат учун чамадон тайёрлаётганда, оғирроқ буюмларни унинг пастки қисмига қўйиш тавсия этилади. Шу тариқа улар чамадоннинг ғилдираклари ёнида жойлашади ва оғирлик марказини ҳосил қилиб, чамадоннинг аэропортда ёки кўча бўйлаб ҳаракатланишини осонлаштиради.
Самолётда қулай дам олиш учун ёстиқча танлови
Агар сиз йўл ёстиқчасини шишириш ва уни бўйнингизга осиб юришдан чарчаган бўлсангиз, уйда оддий ёстиқ қопидан фойдаланинг. Зарурат туғилганда уни юмшоқ кийимлар билан тўлдириб, самолётда ёки кутиш залида бош остига қўйишингиз мумкин.
Оддий тасма ёрдамида сейфдаги буюмларни унутмаслик мумкин
Агар меҳмонхонада сейфдан фойдалансангиз, унинг тутқичига ёрқин тасманинг бир учини боғлаб қўйинг, иккинчи учини эса ҳеч қачон унутмайдиган буюмингизга, масалан, чамадонингизга боғланг. Шундай қилсангиз, хонадан чиқаётганда сейфдаги муҳим нарсаларни унутмаслигингизга ишонч ҳосил қиласиз.
Саёҳатдан олдин қулай пойабзал танлаш мақсадга мувофиқ
Буни қандай қилиш мумкин? Пойабзал сотиб олишдан олдин кичик бир синов ўтказинг: пойабзални ағдариб, оёқни унинг тагига қўйинг. Агар оёқ тагидан ташқарига чиқмаса, демак ҳаммаси жойида. Ана шундай туфли ёки спорт кроссовкалари узоқ саёҳат учун мос келади.
Ранг-баранг пайпоқларни уйда қолдириш маъқул
Биламизки, пайпоқлар кўпинча йўқолиб, кутилмаган жойларда пайдо бўлади. Шунинг учун йўлга фақат битта рангдаги пайпоқларни олиб кетиш тавсия этилади, шунда доим мос жуфтликни излашга тўғри келмайди.
Байрам кунларидаги рейслар арзонроқ бўлиши мумкин
Агар сиз болаларнинг ёзги таътилига боғланмаган бўлсангиз ёки байрам кунларида ҳамма уйда ўтириши шарт деб ҳисобламасангиз, кўпчилик манзилга етиб бўлган саналарда чипта брон қилиб кўринг. Масалан, Янги йил олдидаги рейслар кўпинча арзонроқ бўлади. Шунингдек, йўловчилар сони ҳам камроқ бўлади.
Икки киши бўлиб саёҳат қилаётганлар учун ажойиб маслаҳат
Агар чиптани онлайн брон қилиш имконияти бўлса, бўш қаторни танлаб, дераза ва йўл четидаги ўринларни банд қилинг. Бошқа йўловчилар ўртадаги ўринни танламасликлари мумкин. Агар самолёт тўла тўлмаса, шундай қилиб фақат икковингиз бир қаторда учишингиз эҳтимоли юқори бўлади. Агар кимдир келиб қолса, шунчаки “Мен шеригим ёнида ўтиришни хоҳлайман” деб айтинг.
Изоҳ (0)