Ҳар йили ёзнинг жазирамаси бошлангач, ҳаммамиз ҳам тоққа чиқиб, дам олишни истаймиз. Аммо бир манзара дилни хира қилади – айниқса дам олиш кунлари тоғ йўллари тирбандликка тўлади. Ҳатто соатлаб йўл ёпилган вақтлар ҳам бўлган.
Мана шундай вақтда дам олишга чиққанингизга ҳам пушаймон бўласиз. Аммо Ўзбекистон фақат Чорвоқ ёки Чимён дегани эмас, бепоён юртимизда бунданда ажойиб масканлар кўп. Бугун мана шулардан бири билан таништирамиз.
Мираки
Мираки - Қашқадарё тоғларида жойлашган жавоҳир. У ерга йилнинг исталган вақтида бориб, дам олишингиз мумкин. Сўлим табиат, тоза ҳаво ва энг муҳими - қулай локация туфайли Мираки аллақачон Қашқадарё, Сурхондарё ва Бухоро вилоятлари аҳолисининг севимли масканига айланиб улгурган.
Икки йилдирки Миракига давлат даражасида эътибор қаратилмоқда, янги инфратузилма барпо этиляпти. Осма дор йўли, турли атрраксионлар ва замонавий туризм мажмуаси шулар жумласидандир. Диққат қилинг, Миракидаги 240 гектар майдонда 400 миллион долларлик 117 та лойиҳа амалга ошириляпти.
Эътиборли томони, яқинда давлат раҳбари Шавкат Мирзиёевнинг шахсан ўзи Миракига ташриф буюрди ва амалга оширилаётган ишлар билан танишди. Ҳеч шубҳа йўқки, яқин вақтлар ичида Мираки нафақат ўзбекистонлик сайёҳлар, балки хорижлик туристларнинг ҳам севимли масканларидан бирига айланади.
Йўл
Айтишингиз мумкин, Шаҳрисабз яқин жой эмас, у ерга қандай борса бўлади, деб. Йўл юраман деган одам учун, 400 километр масофа, нима деган гап. У ёғини сўрасангиз, яқинда Шаҳрисабзга самолёт қатнови ҳам йўлга қўйилди. Ҳафтасига 4 та рейс сайёҳлар хизматига шай бўлиб турибди. Самолётга чипта нархлари ҳам ҳамёнбоп - 273 минг сўмга харид қилсангиз бўлади.
Шунингдек, ҳар шанба-якшанба кунлари "Афросиёб" поезди билан Шаҳрисабзга қадар етиб олиш ҳам мумкин.
Нархлари эса қуйидагича:
Эконом тоифаси учун: 466 минг сўм
Бизнес тоифаси учун эса: 658 минг сўм
Автомобиль
Биз ижодий гуруҳимиз билан Мираки сари автомобилда йўлга чиқдик. Бундай сафарнинг яхши томони шундаки, йўл давомида ярим Ўзбекистонни кўриш мумкин. Манзилга етиб олгунга қадар ажабтовур юртимизнинг барча жўғрофий ҳусусиятлари билан танишиб оласиз - Сирдарё чўллари, Жиззах тоғлари, Зарафшон водийси. Манзилга етгунча кўзингиз яшнаб боради.
Мисол учун биз йўлда қатор жойлашган лайлаклар уясини томоша қилиш учун айтайин тўхтадик. Ажойиб манзара, шундай эмасми?
Оқсарой
Қашқадарёга келгандан кейин албатта Шаҳрисабзни алоҳида айланиш керак. Бу ерда буюк соҳибқирон - Амир Темур бунёд этган машҳур Оқсарой бор.
Ёндафтарчангизга алоҳида ёзиб олинг, Оқсарой - Ўзбекистонда албатта бориб кўриш шарт бўлган жойлар сирасига киради. Шаҳрисабзни обдон айланиб, ундан кейин Мираки сари юрсангиз бўлади!
Бу ажойиб масканда нималарни кўрганимизни эса, фильмни томоша қилиш асносида билиб оласиз...
Реклама ҳуқуқи асосида
Изоҳ (0)