Америкалик актёр Том Круз 62 ёшда. Кино юлдузи бу ёшни ҳали ҳам ҳаяжонли ҳис-туйғулардан воз кечиш учун сабаб эмаслигини исботлади. “Миссия: имконсиз – якуний ҳисоб” фильмидаги ақл бовар қилмас трюки учун у Гиннеснинг рекордлар китобига киритилди.
Фильмда таъсирли кадрлар олиш мақсадида актёр ёнувчи модда сепилган вертолётдан парашют билан 16 марта сакраган. Парвоз вақтида парашют ёниб кетган, ва Том Круз ундан халос бўлиши, сўнг эса захира билан ерга тушиши керак бўлган. Баъзи дублларда у танасига маҳкамланган қўшимча камера билан сакраган, бу камера парвоз пайтида яқин пландаги кадрларни суратга олган.
Бу рекорд — Том Круз машҳур бўлган жасур ва тентакона журъатнинг ягона намунаси эмас. Қарийб қирқ йиллик актёрлик фаолияти давомида у деярли каскадёр хизматидан фойдаланмаган, трюкларни мустақил бажарган. Актёр бир неча бор жароҳат олган, ҳатто ўлим билан юзма-юз келган пайтлари ҳам бўлган. Аммо у ҳеч қачон таслим бўлмаган ва режасидан воз кечмаган.
Хавфли ҳис-туйғулар ихлосманди
Том Крузнинг актёрлик карьераси 1981 йилда Франко Зеффирелли режиссёрлигидаги “Чексиз севги” мелодрамасидаги эпизодик роли билан бошланди. Кейинги беш йил ичида у Америка киноларининг ёрқин юлдузига айланди. Ҳарбий драма “Энг яхши мерган”даги Пит Митчел роли унга оммавий машҳурликни тақдим этди. Аммо унинг ҳаётидаги асосий кино франшизаси, ўзининг хавфли трюклари учун майдонча бўлган “Миссия: имконсиз” фильми эди.
Фильмнинг дастлабки қисмида актёр ўзининг биринчи трюкини – аквариум портлашини мустақил тарзда амалга оширди.
“Миссия: имконсиз 2” фильмида у вертикал қоядан эркин кўтарилиш қобилиятини намойиш этди. “Миссия: имконсиз — руҳ протоколи”да дунёдаги энг баланд бино Бурж Халифа чўққисига чиқди. “Миссия: имконсиз — қочқинлар қабиласи”да у Марокаш йўлида пойга саҳнасида мотоцикл ҳайдаб кетди. Унинг энг таъсирли трюкларидан бири эса “Миссия: имконсиз — ўлим жазосида” фильмининг қоядан мотоцикл билан сакраш саҳнаси бўлди.
Трюкларини ўзи бажаришга бўлган муҳаббат актёрга бир неча марта ўлим хавфини келтириб чиқарди. Барча бундай ҳолатлар унинг айби эмас эди, аммо пухта тайёргарлик ва ажойиб омад туфайли Том Круз бугун 62 ёшга тўлиб, фаолиятини давом эттирмоқда.
Фожиа олдида бир қадам
Том Крузнинг “Энг яхши мерган” фильмидаги фожиали саҳнаси унинг кўтарилаётган юлдуз сифатидаги карьерасини якунлашига яқин эди. Унда Крузнинг қаҳрамони, “Гус” лақабли (Энтони Эдвардс ижросида) жиддий жароҳат олган ҳамкасбини сув устида ушлаб туришга ҳаракат қилади. Лекин унинг парашюти тўсатдан сув устида очилиб кетади ва Крузни сув тубига тортиб кетиш хавфи туғилади. Буни суратга олиш гуруҳидан бир сузувчи пайқаб, актёрни вақтида озод қилган.
Тўрт йил ўтиб, “Бўрон кунлари” фильмида Том Круз NASCAR пойгачиси Кўл Трикл ролини ижро этди. Маслаҳатчининг огоҳлантиришларига қарамай, у пойга йўлига чиқиб, ҳақиқий пойгаларда кўрган трюкларини такрорлашга уринди. Натижада у деворга урилиб, қарийб 100 000 долларлик янги камерани синдирди.
“Келажак чегарасида” номли фантастик фильмда эса унга суратга олишдаги шериги Эмили Блант хавф туғдирди. Таъқиб саҳнасида у бурилиш олдидан тўхташ керак эди, аммо кечикди. Кейинчалик актриса Крузнинг ўзига паст овозда тўхта деб айтаётганини эслаган, лекин ўз манёврини кеч амалга ошириб, дарахтга урилди. У Крузнинг ўлимига сабаб бўлдим деб ўйлаган, аммо бахтига актёр фақат бир нечта жойи тирналган эди.
Том Крузнинг энг хавфли ва ақлдан оздирувчи трюкларидан бири — “Миссия: имконсиз – қочқинлар қабиласи” фильмидаги самолёт ташқи қобиғида учишидир. Актёр Airbus А400М самолёти эшигига илинган ҳолда, фақат хавфсизлик камари, махсус кўзойнак ва юпқа ҳимоя жилети билан учган. Айнан бу жилет унга кичик тош зарбаси таъсиридан ҳимоя қилди. Агар тош юзига ёки қўлига тегса, “Миссия: имконсиз – оқибатлар” фильмида бошқа актёр рол ўйнаган бўлар эди. Оқибатда эса фақат қовурғаси синган.
Яхши қилишни хоҳласанг — ўзинг қил
Кўплаб интервьюларда у нима учун ҳаётини хавф остига қўйишини турлича изоҳлади.
Асосий сабаблар бир неча: биринчидан, Том Круз фильмларига томошабинлар хурсанд бўлиб чипта сотиб олишади, чунки улар ҳақиқий ҳаяжонни кутишади. Бу эса кино компаниялари учун қиммат суғурталарни тўлашни оқлайди.
Иккинчидан, актёр билади-ки, томошабинлар ундан янги жасоратларни кутмоқда ва ўз касбининг масъул вакили сифатида актёр уларнинг умидини оқлаши керак. Шу боис ҳар бир янги фильмда трюклар янада хавфли ва таъсирли бўлмоқда.
Учинчидан, Крузнинг ўзи учун ҳам бу зарурдир. Фаолиятининг бошидан у нафақат драматик, балки жисмоний қийинчиликларни ҳам талаб қиладиган кинода суратга тушишни хоҳларди. Шунингдек, у агар трюкларни ўзи бажармаса ва каскадёр юборса, ҳамкасбларининг кўзларига қарай олмаслигини ҳам тан олган.
Изоҳ (0)