Ҳукумат қарори билан жорий йил майдан 2026 йил 1 январгача Ўзбекистондаги маҳаллий авиарейслар чипталарининг 25 фоизи давлат бюджетидан қопланади. Хўш, бунинг учун қанча харажат қилинади? Транспорт вазири ўринбосари Жасурбек Чориев “Дарё”га берган интервьюсида умумий субсидия миқдорини айтди.
Жасурбек Чориевнинг маълум қилишича, авиакомпанияларга республика бюджетидан 60 миллиард сўм субсидия ажратилган.
“Самолётларни ҳам жамоат транспорти деб атаса бўлади. Зомин, Қўқон, Шаҳрисабз, Сариосиё каби кўплаб маҳаллий аэропортларимиз очилди. Улар йиллар давомида ишламай келган, умуман қўллаб-қувватланмаган. Лекин ижтимоий соҳа, туризмни ривожлантириш ва инвесторларга қулайлик яратиш мақсадида улар қайта очилди. Иккинчи томондан самолёт энг қиммат транспорт ҳисобланади. Унинг харажатлари ҳам юқори. Масалан, авиакеросин, техник ҳолатини назорат қилиш нархлари баланд. Шу билан бирга, учувчилар юқори маошга ишлайди. Агар таннархи ёки минимал рентабелликдан келиб чиқиб сотилса, чипталар қиммат бўлиб кетади. Авиакомпания эса зарарга ишлай олмайди. Лекин давлат шу каби ижтимоий йўналишларга субсидия беришга мажбур”, деди вазир ўринбосари.
2021 йилда Ўзбекистондаги аэропортлар давлат-хусусий шериклик асосида реконструкция қилиниши белгиланганди. Жасурбек Чориевнинг айтишича, Наманган ва Бухоро аэропортлари шундай мақсадда хусусий компанияларга топширилади. Урганч ва Мўйноқ аэропортлари ҳам ДХШ лойиҳаси доирасида реконструкцияга берилади. Компаниялар тендер орқали танланади.
Изоҳ (0)