Самарқанд вилоятида 2019 йил ва 2020 йилнинг ўтган даври мобайнида 246 нафар мансабдор турли кўринишдаги коррупцион жиноятлари учун жавобгарликка тортилган. Бу ҳақда Халқ депутатлари Самарқанд вилояти Кенгашининг ўн саккизинчи сессиясида вилоят прокурори Равшан Машарипов маълум қилган.
Вилоят прокурорининг айтишича, мазкур жиноятлар оқибатида етказилган моддий зарар миқдори 25,3 миллиард сўмдан ошган.
Прокурорнинг аниқлик киритишича, мазкур жиноятларнинг 19 таси банк, 17 таси олий таълим, 15 таси халқ таълими, 33 таси соғлиқни сақлаш, 20 таси мактабгача таълим, 4 таси солиқ, 21 таси ИИБ, 8 таси МИБ, 3 таси суд соҳаси ҳамда 58 таси бошқа корхона, ташкилот ходимлари томонидан содир этилган.
Хусусан, 2020 йилнинг ўтган даври мобайнида бир нафар ҳоким ўринбосари, вилоят қурилиш бош бошқармаси бошлиғи ўринбосари, капитал қурилиш дирекцияси собиқ бошлиғи, кадастр идорасининг 4 нафар мансабдор ва 10 нафар бошқа масъул ходими жиноий жавобгарликка тортилган.
Мисол учун «Афросиёб Строй Сервис» МЧЖ раҳбари Камолиддин Шукуров, Самарқанд шаҳар ҳокимининг собиқ ўринбосари Бобур Элмуродов, Капитал қурилиш дирекцияси собиқ бошлиғи Темур Холиқулов ва бошқалар ўзаро жиноий тил бириктириб, шаҳар ҳокимлиги мансабдор шахсларининг ихтиёрида бўлган 7,5 миллиард сўмлик жуда кўп миқдордаги пул маблағларини ўзлаштириш ва растрата қилиш йўли билан талон-торож қилиб юборган.
Шунингдек, «Қоракисса нурли қурилиш» МЧЖ иш бошқарувчиси Ҳошимов, Қўшработ тумани халқ таълими бўлими мудири Шакаров ва бошқалар билан 3 та мактабнинг ҳожатхоналарини таъмирлаш учун ажратилган 160 миллион сўм бюджет маблағларини ўзлаштириш йўли билан талон-торож қилган.
Изоҳ (0)