2021 йилда коррупцияни қабул қилиш индексида Ўзбекистон 6 поғонага кўтарилиб, 180 та мамлакат орасида 140-ўринни эгаллади. Бу ҳақда Олий Мажлис Сенатида бўлиб ўтаётган Коррупцияга қарши курашиш миллий кенгашнинг навбатдаги мажлисида таъкидланди, деб хабар бермоқда «Дарё» мухбири.
Мажлис аввалида Сенат раиси Танзила Норбоева соҳалардаги коррупциявий ҳолатлар ҳақида маълумот берган. Қайд этилишича, мамлакатда 2021 йилда 5 483 нафар шахсга нисбатан 3 769 та коррупциявий жиноят ишлари судларга оширилган. Яъни судга юборилган жиноят ишлари ҳамда жавобгарликка тортилган шахслар сони ўртача 3 бараварга кўпайган.
Судларга юборилган жиноят ишларининг ҳар учтадан биттаси соғлиқни сақлаш, таълим ва банк тизими ходимлари томонидан содир этилган. Коррупцияга қарши курашиш борасида олиб борилган кескин чоралар натижасида судга юборилган жиноят ишлари сони ўтган йилга нисбатан банк соҳасида 300 фоизга, таълим тизимида 120 фоизга ҳамда соғлиқни сақлаш соҳасида 100 фоизга ортган.
«Таҳлилларга кўра, бугунги кунда, коррупцияга оид жиноятларни содир этишда тўғридан-тўғри порахўрлик билан эмас, балки фирибгарлик йўли билан ўзгалар мулкини ўзлаштириш ёки растрата йўли билан талон-торож қилиш кўринишидаги жиноятларни содир этиш ҳолатлари кўпаймоқда. Албатта, бу билан жамоатчилик онгида коррупция билан боғлиқ жиноятчилик ортмоқда, деган бир томонлама фикр шаклланиши керак эмас», — дейди Сенат раиси.
Танзила Норбоеванинг айтишича, давлат харидлари ва соғлиқни сақлаш соҳалари таҳлил қилинганида, дастурлар, «йўл хариталари» ва бошқа чора-тадбирлар режалари қабул қилинмоқда, вазифалар белгиланмоқда, лекин уларда белгиланган вазифалар бажарилмасдан қолмоқда.
Изоҳ (0)