Ўзбекистонда 2021 йилда давлат органлари ва ташкилотларида ишловчи 3050 нафар ходим томонидан 4186 ҳолатда коррупцион жиноят қайд этилган. Бу ҳақда АОКАда бўлиб ўтган брифингда Коорупсияга қарши курашиш агентлиги ахборот хизмати раҳбари Дурдона Очилова маълум қилди.
Қайд этилишича, ўтган йилда коррупциянинг олдини олишга қаратилган 26 та норматив-ҳуқуқий ҳужжат лойиҳаси ишлаб чиқилган бўлиб, ҳозирда ушбу ҳужжатларнинг 8 таси қабул қилинган.
Шунингдек, 2021 йилда Давлат харидлари тўғрисидаги қонун ҳужжатлари ижроси бузилгани оқибатида 142,7 миллиард сўм миқдоридаги моддий зарар етказилгани билан боғлиқ қонунбузилиш ҳолатлари аниқланган. Ушбу тадбирлар давомида аниқланган коррупция ҳолатлари юзасидан тўпланган ҳужжатлар ҳуқуқни муҳофаза қилувчи органларга тақдим қилиниб, Жиноят кодексининг тегишли моддалари билан умумий 49 та жиноят иши ва 24 та маъмурий ишлар қўзғатилган.
Бундан ташқари, бюджет буюртмачилари томонидан объектларни қуриш ва жорий таъмирлаш бўйича «Dxarid.uz» ва «Tender.mc.uz» махсус ахборот порталида жойлаштирилган эълонлар жойларга чиққан ҳолда ўрганилганда, дастлабки аниқланган жами 134 та объектда 85,5 миллиард сўмлик жорий таъмирлаш ва қурилиш ишлари танлов ғолиблари аниқланмасдан бошлаб юборилгани ёки аллақачон тамомлангани маълум бўлган.
Таҳлилларга кўра, 2021 йилнинг ўтган 12 ойи мобайнида 6 294 нафар шахс томонидан 7 953 та коррупцион ҳолат билан боғлиқ жиноятлар содир этилган. Шундан, давлат органлари ва ташкилотлари зиммасига юклатилган вазифа ва функцияларни бажаришга оид 3050 нафар шахс томонидан 4186 та коррупцион ҳолат билан боғлиқ жиноятлар ҳисобга олинган.
Аввалроқ Бош прокуратура 2021 йил давомида мамлакатда жами 2 345 та жиноят иши бўйича 2 804 нафар мансабдор шахслар жиноий жавобгарликка тортилганини маълум қилганди.
Изоҳ (0)