Мўғулистон пойтахти Улан-Баторда оммавий норозилик акциялари учинчи кун ҳам давом этмоқда, намойишчилар мансабдорларни кўмир етказиб бериш соҳасидаги коррупцияларда айбламоқда. Бу ҳақда Мўғулистоннинг Сонин нашри хабар бермоқда.
Мўғулистон пойтахти раҳбари Долгорсуренгийн Сумяабазар пойтахтдаги марказий майдонда ва ҳукумат қароргоҳи яқинида намойишга чиққанларни куч билан тарқатиш ҳақида буйруқ берди. Шу билан бирга, тегишли органларга иштирокчиларни зарурат юзага келган тақдирда фуқароларнинг мажбуран тарқатилиши ҳақида олдиндан огоҳлантириш юклатилди.
«Бугунги намойишлар рўйхатга олинмаган ва уларда қатнашаётган фуқаролар хавфсизлиги тўлиқ таъминланмаган. Шу тариқа, миллий хавфсизликка, инсон ҳуқуқ ва эркинликларига зарар етказиб, жамоат тартибини бузиши мумкин бўлган тартибсизликлар муносабати билан, тегишли моддалар асосида Улан-Батор губернатори акцияларни тарқатиб юбориш ҳақида фармон чиқарди», — дейилади хабарда.
Таъкидланишича, полициячилар оломонни тарқатиш учун куч қўллашига ҳожат бўлмаган, чунки Улан-Батордаги намойишлар тинч йўл билан якунланган. Шу муносабат билан, пойтахт губернатори ўз буйруғини бекор қилган, милиция ходимлари эса огоҳлик даражасини пасайтирган.
Бундан ташқари, Мўғулистон президенти Ухнаагийн Хурельсух мамлакатда фавқулодда ҳолат режимини киритиш учун зарурат йўқлигини айтди. Уни мамлакат бош вазири Лувсаннамсрайн Оюун Эрдене қўллаб-қувватлади.
Бу орада Хитой Ташқи ишлар вазирлиги расмий вакили Мао Нин Хитой тегишли сўров келиб тушган тақдирда, Мўғулистонга эҳтимолий ўғриликларни текширишда ёрдам беришга тайёрлигини билдирди.
Эслатиб ўтамиз, Мўғулистонда 3 декабрь куни Хитойга экспорт қилинадиган кўмир атрофида коррупция можароси юз берди.
Аввалроқ Хитой ОАВлари мамлакат Мўғулистон ҳукуматига порахўр давлат хизматчилари рўйхатини бергани ҳақида маълум қилганди. Улар жиноий схема ёрдамида кўмир савдосидан 12,9 миллиарддан 17,6 миллиард долларгача ўғирлаган. Мўғулистон мансабдорлар исмларини ошкор қилишдан бош тортди, шундан кейин Улан-Баторда бу маълумотларни ошкор этишни талаб қилиб намойишлар бошланди. 5 декабрь куни акция иштирокчилари Ҳукумат саройини эгаллаб олишга уринди, оқибатда олти киши жабрланди.
Изоҳ (0)