Ўзбекистонда коррупция хавф-хатарларини аниқлаш ва бартараф этиш бўйича янги механизм жорий этилади. Бу ҳақда Коррупцияга қарши курашиш агентлиги матбуот хизмати хабар берди.
Маълум қилинишича, 13 май куни Бош прокуратурада Коррупцияга қарши курашиш миллий кенгашининг кенгайтирилган йиғилишида давлат раҳбари томонидан белгилаб берилган вазифалар ижросини таъминлаш борасида амалга оширилаётган ишлар муҳокамасига бағишланган йиғилиш бўлиб ўтди. Унда бош прокурор биринчи ўринбосари Баҳриддин Валиев, Коррупцияга қарши курашиш агентлиги директори Акмал Бурхонов ҳамда Президент администрацияси масъул ходими иштирок этди.
Бош прокуратура матбуот хизматининг хабар қилишича, йиғилишда коррупциявий омилларни аниқлаш ва бартараф этиш бўйича “Андижон тажрибаси” асосида барча ҳудудлар томонидан “йўл хариталари” ишлаб чиқилиб, ижрога қаратилгани, коррупциянинг олдини олиш, айниқса, маиший коррупцияга барҳам бериш, ҳудудларда коррупцияга нисбатан муросасиз муҳит яратиш мақсадида янги механизмларни йўлга қўйиш юзасидан тузилган Республика ва ҳудудий ишчи гуруҳларининг вазифалари бирма-бир таъкидлаб ўтилди.
Жумладан, ҳудудий ишчи гуруҳларига ҳар ҳафтада бевосита битта ҳудудга чиққан ҳолда коррупция хавф-хатари юқори бўлган объектларда коррупциявий омилларни ўрганиш ва уларни бартараф этиш чораларини кўриш топширилди.
Шунингдек, Республика ишчи гуруҳи аъзоларига ҳудудларда амалга оширилган вазифалар ижросини сифатли ташкил этишни назорат қилиш ва ҳар ҳафта жойига чиққан ҳолда бажарилган ишларни ўрганиб, натижалари юзасидан танқидий муҳокамалар ўтказиб бориш бўйича режа-график ишлаб чиқиш ҳамда коррупциявий омилларни бартараф этишга қаратилган таклифларни тайёрлаш белгилаб олинди.
Йиғилишда барча ҳудудларга ишлаб чиқилган “йўл хариталари” бўйича белгиланган чора-тадбирларни ўз вақтида сифатли бажариш ҳамда ҳудудий ишчи гуруҳлар фаолиятини самарали йўлга қўйиш юзасидан топшириқлар берилди.
Тадбир сўнгида, вилоят прокурорларининг биринчи ўринбосарлари, ишчи гуруҳ аъзоларининг тушунтириш ва ахборотлари эшитилиб, улар томонидан келгусидаги фаолиятида ҳудудларда коррупциявий омилларни аниқлаш ва бартараф қилишда самарадорликка эришилмаган тақдирда қатъий чоралар қўлланиши ҳақида огоҳлантирилди.
2024 йил сентябрида Олий Мажлис Сенатининг йиғилишида тақдим этилган коррупцияга қарши курашиш бўйича учинчи миллий маърузада, коррупция билан боғлиқ жиноятлар натижасида давлат манфаатларига етказилган зарарнинг юқори улуши Андижон вилоятига тўғри келгани маълум қилинганди.
Изоҳ (0)