Тошкент шаҳрида тиббиёт йўналиши бўйича фуқарони 3-босқичдан ўқишга киритиб қўйишни ваъда қилган шахс ушланди. Бу ҳақда Бош прокуратура ҳузуридаги департамент хабар берди.
Маълум қилинишича, фуқаро С.Э. фуқаро А.А.нинг ишончига кириб, танишлари ёрдамида гўёки қўшни Қозоғистон ОТМнинг 2-босқичини тугатганлиги тўғрисида ҳужжат расмийлаштириб беришни ваъда қилади. У ушбу ҳужжат орқали Тошкентдаги нодавлат ОТМга тиббиёт йўналишига 3-босқичдан ўқишга киритиб қўйишини айтади.
Бунинг эвазига 48 млн сўм пул бериши кераклигини айтиб, ушбу пуллар ҳисобидан 1000 долларини олган вақтида ушланган.
Мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Сўнгги ойларда эълон қилинган фирибгарлик ва коррупция ҳолатлари
Март ойида Тошкент шаҳри ва вилоятида фуқароларни ишга киритиб қўйиш учун пул олган Миллий гвардия ходимлари қамоққа олинди. Февралда Тошкент шаҳрининг Яшнобод, Навоий шаҳри ҳамда Фарғона вилоятининг Олтиариқ туманларида фуқароларга имтиёзли кредит олиб беришни ваъда қилган шахслар ушланди. Хоразмда транспорт бошқармаси бош мутахассиси 80 минг доллар олаётганида қўлга тушди. Январда Тошкентнинг Учтепа туманида ҳоким ёрдамчиси 30 минг доллари олаётганига ушланди.
Изоҳ (0)