Қатар Европарламентдан четлатилиши қандай оқибатларга олиб келиши ҳақида огоҳлантирди

Қатар Европа парламентидаги коррупция можароси айбловларини рад этди ва қатарлик мансабдорлар Европарламент киритилмай қўйган тақдирда, газ етказиб бериш бўйича салбий оқибатлар ҳақида огоҳлантирди. Бу ҳақда Доҳанинг баёнотига таяниб, AFP хабар берди.

Баёнотда айтилишича, суд жараёни тугагунига қадар Қатарнинг Европа парламентидан четлаштирилиши «дискриминацион» чора ва у «хавфсизлик соҳасидаги минтақавий ва глобал ҳамкорликка ҳамда глобал энергия танқислиги ва хавфсизлик бўйича жорий музокараларга салбий таъсир қилади». «Ҳукуматимизнинг қонун бузилишларига алоқадорлиги ҳақидаги айбловларни қатъиян рад этамиз», — дейилади хабарда.

Европарламентдаги коррупция можароси

Декабрь бошида Европарламент раиси ўринбосари, Грециядан социал-демократик қанот вакили Ева Кайли футбол бўйича жаҳон чемионатига мезбонлик қилган Қатар томонидан эҳтимолий коррупция юзасидан текширув доирасида олти нафар гумонланувчидан бирига айланди. Бунга Бельгия прокуратурасининг Қатар «катта пул маблағи ва совғалар ёрдамида Европарламент қарорларига таъсир қилишга интилгани» ҳақидаги гумонлари асос бўлди.

11 декабрь куни Бельгия ҳукумати тўрт нафар гумонланувчига нисбатан айбловлар эълон қилди ва уларни ҳибсга олиш учун ордер берди. «Улар жиноий уюшишда, пул ювишда ва коррупцияда айбланмоқда», — деди прокуратура. Кайлининг ўзи барча айбловларни инкор қилди.

Европарламент депутатларининг аксарияти 15 декабрь куни текширув вақтида қатарлик мансабдорларни Европарламентдан четлатишни ёқлаб овоз берди. Якуний қарор парламент спикери Роберта Мецола томонидан берилиши керак. Унинг сўзларига кўра, бундай лоббизмга қарши қаратилган ислоҳотлар пакети келаси йил тақдим этилади.