Россиялик олимлар Каспий денгизининг шимолий қисмида сув сатҳининг пасайиши натижасида янги орол пайдо бўлганини тасдиқлашди. Бу ҳақда Россия фанлар академиясининг Ширшов номидаги Океанология институти матбуот хизмати маълум қилди.
Россия Фанлар академияси Океанология институти, унинг Каспий филиали ва Астрахан давлат қўриқхонасининг Шимолий Каспийга уюштирган кенг қамровли экспедицияси давомида олимлар Кичик Marvarid оролидан 30 км жануби-ғарбда янги орол мавжудлигини тасдиқлашга эришган. Дастлаб, саёзликнинг қуриб қолиши 2024 йил ноябрь ойида Океанология институтининг Каспий филиали ходимлари томонидан космик суратларда аниқланган, бироқ оролнинг мавжудлиги масаласи яқин вақтгача баҳсли бўлиб келган.
Хабарда айтилишича, янги кашф этилган орол Каспий денгизи сатҳининг пасайиши ва Ўрта Marvarid саёзлигининг юзага чиқиши натижасида пайдо бўлган.
Маълум қилинишича, экспедиция оролнинг шимолий қисмига яқинлашишга эришган, бироқ атрофдаги саёзликлар ва об-ҳаво шароитлари туфайли қирғоққа чиқиш имкони бўлмаган. Шундай бўлса-да, орол квадрокоптердан олинган тасвирларда аниқ кўриниб турибди. Яқин кунларда олимлар янги оролнинг дастлабки тавсифини яратиб, унинг географик номланиши бўйича таклифлар тайёрламоқда.
“Ҳозирги пайтда, Волга дарёсининг сув тошқини чўққисидаги максимал оқим даврида орол денгиз сатҳидан бир оз баландроқ қуруқликни ташкил этади. Аниқ кўриниб турибдики, сув сатҳи энг паст бўлган пайтда оролнинг сув юзасидан кўтарилиши янада сезиларли бўлади. Текширув пайтида орол юзи қум тепаликлари билан мураккаблашган нам текисликдан иборат эди”, дейилади институт хабарида.
Қайд этилишича, Каспий денгизи сатҳининг янада пасайиши натижасида бу орол яқин йилларда ўз майдонини сезиларли даражада кенгайтириши ва ноёб қуш турларининг ин қуриш жойи ҳамда Каспий тюленларининг ётоғи сифатида катта аҳамият касб этиши мумкин.
Изоҳ (0)