Ғарбий Қозоғистон вилоятида Россиянинг Shahed дронига ўхшаш учувчисиз учиш аппарати топилди. Бу ҳақда “Казинформ” хабар берди.
Дрон Россия билан чегарадош Тасқалъа туманида топилган. Объектнинг узунлиги 300 сантиметр. Полиция департаменти ваколатли хизматлар билан ҳамкорликда ташқи кўриниши дронга ўхшаш аппарат аниқлангани юзасидан текширув ўтказмоқда.
Объект узоқ ҳудудга, аҳоли пунктларидан узоқ жойга тушган ва бутунлай сақланиб қолган, кўринадиган зарарлари йўқ. Ҳодисанинг барча тафсилотлари аниқланмоқда, дейилади полиция департаменти баёнотида.
Дрон ташқи кўринишидан Россиянинг “Shahed”ига ўхшашлигини ва ҳатто тегишли белгига эга эканини кўриш мумкин. Ҳарбий шарҳловчи Амангелди Курмет учувчисиз учиш аппарати Эроннинг Shahed 136 дрони эканини айтмоқда. Россия мазкур дронлардан Украинага қарши ҳужумларда кенг фойдаланиб келмоқда.
Қурилманинг бир қанотига сариқ рангда “Геран” ёзуви туширилган. Мутахассис Россияга етказиб берилаётган Эроннинг Shahed ҳарбий дронлари “Геран” деб аталишини эслатди. Шунингдек, учар қурилмада “18358” ва “С2ВКМ” рақамлари туширилган.
Қулаган қурилма, шубҳасиз, Эроннинг Shahed 136 дрони. Барча характерли белгилари акс этган. Эҳтимол, у бир оз ўзгартирилган бўлиши мумкин. Унинг модификациясини текшириш зарур. Лекин “Геран” — бу Shahed 136 дрони, дейди таҳлилчи, “Курсив.Медиа”га берган интервьюсида.
У Эрон биринчи марта Shahed 136 дронини 2020 йилда намойиш қилганини эслатиб ўтди. Уни кўпинча “камикадзе-дрон” деб аташади. 2022 йилда Эрон ушбу дронларни Россиянинг қуролли кучларига етказиб бера бошлади. Россия номини “Геран-2”га ўзгартирди ва уларни Украина билан урушда ишлатмоқда. 2023 йилдан бошлаб Москва Эрон дронларини ўз ҳудудида ишлаб чиқаришга киришди.
Изоҳ (0)