Қозоғистон 2024 йилда Боку—Тбилиси—Жейҳун йўналиши бўйича 1,5 миллион тонна нефть етказишни режалаштирмоқда. Бу ҳақда мамлакат энергетика вазири Алмасадам Саткалиев хабар берди.
Қозоғистон узоқ муддатли истиқболда экспортни йилига 20 миллион тоннагача оширишни режалаштирмоқда, аммо аниқ муддатлар ҳозирча айтилмаган.
Ўрта муддатли истиқболда нефть қазиб олишнинг ўсиши ва янги денгиз лойиҳаларини ишга туширишни ҳисобга олган ҳолда, қўшимча ташиш йўналишларини ривожлантириш бўйича ишлар олиб борилмоқда. Қозоғистон нефтини етказиб бериш ҳажмини ривожлантириш ва мунтазам равишда оширишда ҳам биз, ҳам озарбайжонлик ҳамкорларимиз манфаатдор, деди Саткалиев.
Вазирнинг айтишича, Қозоғистон келажакда нефтни Боку—Супса (Озарбайжон—Грузия) қувури орқали етказиб беришни режалаштирмоқда. Етказиб беришнинг тахминий ҳажми йилига 3 миллион тоннага етиши мумкин, қувурнинг ўтказиш қобилияти 5 миллион тоннани ташкил этади. Ҳозирда ушбу йўналиш муҳокама ва ишлаб чиқиш босқичида.
Бундан ташқари, йилига 20-30 миллион тонна техник қувватга эга бўлган Эскене—Курик нефть қувурини қуриш лойиҳаси устида ишланмоқда.
Маълум қилинишича, Боку—Тбилиси—Жейҳун йўналиши бўйича 10 ой ичида 1,2 миллион тонна Қозоғистон нефти етказиб берилган. Дастлаб хом ашё Каспий денгизи орқали кейинги ташиш учун Ақтау портига юборилади. Нефть экспорти Италия, Нидерландия, Франция, Греция, Туркия ва бошқа мамлакатларга амалга оширилади.
Қозоғистон 2024 йилда 68,8 миллион тонна нефть экспорт қилишни режалаштирмоқда (бу умумий қазиб олиш ҳажмининг 78 фоизини ташкил этиб, жами 88,4 миллион тоннага етади).
Етказиб беришнинг асосий қисми (55,4 миллион тонна) Каспий қувурлари консорсиуми орқали амалга оширилиши кўзда тутилган. Атирау—Самара йўналишида 8,6 миллион тонна, Хитойга 1,1 миллион тонна, Ақтау портига 3,6 миллион тонна нефть экспорт қилиш кутилмоқда.
Изоҳ (0)