Каспий денгизи туби бўйлаб электр кабелини ўтказиш бўйича Қозоғистон—Ўзбекистон—Озарбайжон қўшма уч томонлама лойиҳаси муваффақиятли амалга оширилса, Ўзбекистон 2030 йилдан бошлаб ортиқча электр энергиясини Европага экспорт қила олади. Бу ҳақда Энергетика вазирлиги раҳбари Жўрабек Мирзамаҳмудов Остонада бўлиб ўтаётган Марказий Осиё энергетика вазирларининг биринчи йиғилиши доирасида маълум қилди.
“Жорий йил якунига қадар қайта тикланадиган энергия манбаларидан олинадиган умумий энергия қувватини 4 ГВт дан ортиқ даражага етказамиз. 2030 йилга бориб бу кўрсаткич 20 ГВт дан ошади, шундан 2 дан 5 ГВтгача Европага экспорт қилинади, деган у Репорт мухбирига берган интервьюсида.
Унинг сўзларига кўра, экспортнинг аниқ ҳажми электр энергиясини узатиш тизимининг қуввати ва европалик харидорларнинг эҳтиёжларига боғлиқ бўлади.
Вазирнинг қайд этишича, Ўзбекистондан борадиган электр энергияси Марказий Осиёнинг ягона энергетика тизими орқали Қозоғистондан Каспий денгизи туби бўйлаб кабел орқали Озарбайжонга, у ердан Грузияга, сўнгра Қора денгиз тубидаги кабел бўйлаб Руминия, Венгрия ва Болгарияга етказилади.
Ўзбекистонни ривожлантириш стратегиясига мувофиқ, 2030 йилга бориб умумий ишлаб электр чиқариш қуввати 2,4 баробарга — 44,9 ГВтгача оширилади. Шу билан бирга, қайта тикланадиган энергия манбаларининг улуши 40 фоизга етказилади ва бу мақсадда умумий қуввати 18,8 ГВт (8,6 ГВт — қуёш, 10,2 ГВт — шамол) бўлган қуёш ва шамол энергияси ишлаб чиқариш лойиҳалари амалга оширилади.
Энергетика вазирлиги матбуот хизмати берган маълумотга кўра, Ўзбекистонда 2021 йилдан бошлаб бугунги кунга қадар 10 та “яшил” электр станция — 9 та қуёш ва 1 та шамол электр станцияси (жами қуввати 2 минг 500 мегаваттдан ортиқ) ишга туширилди. Бундан ташқари, умумий қуввати 2 минг 200 мегаваттдан зиёд бўлган гидроэлектр станциялари ҳам мавжуд.
Бундан 3 йил олдин Ўзбекистон электр энергетика тармоғида қазиб олинадиган ёқилғида ишловчи электр станциялар (ИЭС) улуши 90 фоиз атрофида бўлган бўлса (10 фоизи ГЭСлар), охирги йилларда ишга туширилган “яшил” электр станциялар ҳисобига бу кўрсаткич 70 фоизгача тушди. Яъни, бугунги кунда ишлаб чиқариладиган электр энергиясининг 25-30 фоизгача қисми “яшил” станциялар ҳиссасига тўғри келмоқда.
Изоҳ (0)