Каталониянинг машҳур “Барселона” клуби сўнгги йилларда дуч келган молиявий инқироздан аста-секин чиқиб бормоқда. Испаниянинг Sport нашри хабарига кўра, клуб 2020 йил пандемия даврида футболчиларга тўланмай қолган маошлар бўйича барча қарзларини тўлиқ ёпди.
Маълумотларга кўра, якуний тўлов миқдори 16 миллион еврони ташкил этган. Бу маблағ бир нечта футболчи ва мураббийларга тўлаб берилган. Улар орасида Лионель Месси, Филиппе Коутиньо, Роналд Куман ҳамда бошқа бир қанча собиқ жамоа аъзолари бор.
Эслатиб ўтамиз, Месси “Барселона”ни 2021 йилда тарк этган эди. Ўшанда клуб молиявий чекловлар сабабли унга янги шартнома таклиф қила олмаган. Натижада, аргентиналик юлдуз Парижнинг “ПСЖ” клубига ўтди ва у ерда икки мавсум ҳаракат қилди. Кейинчалик эса АҚШнинг MLS лигасига йўл олиб, “Интер Майами” сафига қўшилди. Ҳозирда Мессининг “Интер Майами” билан амалдаги шартномаси 2025 йил охиригача мўлжалланган.
Изоҳ (0)