«Барселона»да 10-рақамнинг янги эгаси пайдо бўлди. Афсонавий рақам Каталония жамоасининг истеъдодли футболчиларидан бири — Ансу Фатига насиб этди. Ла Лига қоидаларига кўра, ушбу рақам бўш қолмаслиги керак, шунинг учун раҳбарият Мессининг рақамини кимгадир бериши лозим эди.
Ансу яқиндагина жиддий жароҳатдан тузалганига қарамасдан тарихий рақамни олишдан чўчимади.
- Фати 2020 йил ноябрь ойида «Бетис»га қарши ўйинда жароҳат олди ва майдонни тарк этди. Футболчининг жароҳати жиддий бўлиб чиқди, 2021 йил март ойида майдонга қайтиши мумкинлиги айтилди.
- Март ойида Ансунинг тикланиши секин кечаётгани, «Барселона» эса уни майдонга тушириб таваккал қила олмаслиги хабар қилинди.
- Испаниялик футболчи яна бир операцияни бошидан ўтказди. Португалия терма жамоасининг шифокори Жозе Карлос Нороня ишга киришди. У тиззадаги жароҳатлар бўйича дунёдаги энг яхши мутахассислардан бири, Криштиану Роналду ҳам унинг хизматидан фойдаланади. Фати Евро—2020 да иштирок эта олмади.
- Июль ойида Ансу тузала бошлади — шифокорлар унга жамоадошлари билан машғулот ўташга рухсат берди. Орадан бир ой ўтиб, ёш футболчи тўп билан муомала қила бошлади.
- Диарио Спорт нашрининг хабарига кўра, Фати Ла Лига 5-тури доирасида 19 сентябрь куни кечадиган «Гранада»га қарши ўйинда майдонга тушиши мумкин.
Ансу Фати «Барселона»даги фаолиятини қандай бошлаган?
- 2019 йил август ойи — Ансу илк бор «Барселона» сафида майдонга тушди. «Бетис»га қарши ўйинда дебют қилган ёш испан тарихий рекорд қайд этди. Охирги 78 йилда «Барселона»да дебют қилган энг ёш футболчига айланди. «Кантерано» вакили 16 ёш-у 298 кунлик эди.
- Лионель Месси Фатини қўллаб-қувватлади:
Биринчи кун у билан шуғулланганимда ҳайратда қолгандим. Биз билан бирга машғулотлар ўтади, унинг ажойиб хислатлари бор. Биз у билан бўлишимиз, ортиқча босим ҳис қилмаслигини таъминлашимиз лозим. Атрофидаги шовқин унинг ривожланишига халақит бермаслиги учун ёрдам беришимиз керак. Буюк футболчи бўлиши учун унда барча нарса мужассам.Лионель Месси
- 2019/20 йилги мавсумда Фати Ла Лигада минг дақиқадан кўпроқ майдонга тушди ва 7 та гол урди. 17 ёшида эса Испания терма жамоасидан чақирув олди.
- 2020/21 йилги мавсум Ансумане учун янада яхшироқ бошланди: 10 ўйинда 5+4 очко. Аммо жароҳат барча режаларни барбод қилди. Фати мавсумнинг қолган қисмини ўтказиб юборди.
Энди эса оғир жароҳат унинг фаолиятига жиддий таъсир ўтказмаслигига умид қилиш керак. Кўпчилик уни Лео Мессининг издоши сифатида кўради. 10-рақам ҳам бекорга берилмади.
Изоҳ (0)