Дунё ва ўзбек спортига оид 4 январнинг энг муҳим хабарлари дайжести билан танишинг.
Ўзбекистон
IFFHS талқинига кўра Осиёнинг энг яхши ёш ўйинчиларидан иборат 2021 йил рамзий терма жамоаси тузилди. Ундан 2 нафар ўзбекистонлик футболчи жой олдиХалқаро футбол тарихи статистикаси федерацияси (IFFHS) Осиёнинг энг яхши ёш ўйинчиларидан иборат 2021 йил рамзий терма жамоасини тузди. Ундан икки нафар ўзбекистонлик футболчи ҳам жой олди. Булар: «Насаф» дарвозабони Абдувоҳид Неъматов ва «Нижний Новгород» (Россия) ҳимоячиси Иброҳимхалил Йўлдошев.
Суперлига клублари 2022 йилги мавсум учун янги футболчилар билан шартнома имзоламоқда
«Локомотив Тошкент» ўтган мавсумни «Қўқон-1912»да ўтказган Муҳаммаданас Ҳасанов билан икки йиллик шартнома имзолади.
2021 йилда «Турон» шарафини ҳимоя қилган Суннатулла Абдуллажонов эса «Нефтчи»га ўтди.
«ОКМК» Хуршид Ғиёсов билан икки йиллик шартнома имзолади. Ҳужумчи 2021 йилги мавсумни «Бунёдкор» сафида ўтказганди.
Олег Зотеев эркин агентга айланди
Олег Зотеев Жанубий Кореянинг «Чоннам Драгонс» клубини тарк этди. Бу ҳақда клуб матбуот хизмати хабар берди.
Ўзбекистонлик ярим ҳимоячи шартномаси якунланганидан сўнг клубни эркин агент мақомида тарк этган. У 2020 йилнинг июнь ойидан бери мазкур клубда тўп тепиб келаётганди.
Ноябрь ойида «Чоннам Драгонс» Жанубий Корея ФА Кубоги соҳибига айланганди ва ОЧЛ йўлланмасига эга бўлганди.
Жаҳон
Пушкаш совринига номзодлар эълон қилинди
Йилнинг энг чиройли голи — Пушкаш совринига даъвогарлик қилаётган уч нафар футболчи номи маълум бўлди.
Ғолибликка «Тоттенҳэм» ярим ҳимоячиси Эрик Ламеланинг рабона услубида «Арсенал»га (1:2) дарвозасига урган голи, Чехия терма жамоаси ҳужумчиси Патрик Шикнинг Евро—2020 да Шотландияга (2:0) узоқ масофадан йўллаган зарбаси ва «Порту» форварди Меҳди Таремининг Чемпионлар Лигаси доирасида «Челси»га (1:0) қарши ўйиндаги голи даъвогарлик қилмоқда.
Эслатиб ўтамиз, тақдирлаш маросими 17 январь куни Цюрихда бўлиб ўтади, ўша куни The Best ғолиблари эълон қилинади.
Аллегри Моратани «Барселона»га қўйиб юбормоқчи эмас
Ҳужумчи Альваро Моратанинг «Ювентус»дан «Барселона»га трансфери амалга ошмаслиги мумкин.
Турин клуби уни ҳозирча қўйиб юбориш ниятида эмас. Боиси жамоа бош мураббийи Массимилиано Аллегри мавсумнинг иккинчи ярмида ҳам Моратани режаларига киритмоқда. Бу ҳақда Аллегри душанба куни бўлиб ўтган йиғилишда футболчига маълум қилган. Бунга, биринчидан, испанияликнинг яхши ўйин кўрсатаётгани сабаб бўлаётган бўлса, иккинчидан, трансфер бозорида унга муносиб альтернатива йўқ.
Аввалроқ Моратанинг «Барселона»га ўтиши деярли ҳал бўлгани ҳақида хабар берилганди.
Коутиньо қишда «Барселона»дан кетмоқчи
Ярим ҳимоячи Филиппе Коутиньо қишки трансфер ойнасида «Барселона»ни тарк этмоқчи.
Таъкидланишича, бразилиялик футболчи Қатарда бўлиб ўтадиган Жаҳон Чемпионатини инобатга олган ҳолда кўпроқ ўйин амалиётига эга бўлмоқчи.
Ҳозирда унга «Ньюкасл» ва «Арсенал»дан қизиқиш борлиги айтилмоқда. Унинг ўзи «тўпчилар» вариантига қизиқяпти.
L’Equipe йил рамзий терма жамоасига Роналду ва Мессини киритмади
Франциянинг L’Equipe журнали 2021 йил учун рамзий жамоасини тузди.
Эътиборлиси, унга «Олтин тўп» соҳиби, ҳозирда «ПСЖ»да тўп сураётган Лионель Месси киритилмаган. Шунингдек, «Манчестер Юнайтед» ҳужумчиси Криштиану Роналду ҳам таркибдан ўрин олмаган.
L’Equipe талқинига кўра 2021 йилнинг рамзий терма жамоаси:
Дарвозабон: Эдуар Менди («Челси»).
Ҳимоячилар: Трент Александер-Арнольд («Ливерпуль»), Рубен Диаш («Манчестер Сити»), Маркиньос («ПСЖ»), Тео Эрнандес («Милан»);
Таянч ярим ҳимоячилари: Нголо Канте, Жоржиньо (иккиси ҳам «Челси»);
Вингерлар: Муҳаммад Салоҳ («Ливерпуль»), Кевин де Брюйне («Манчестер Сити»).
Ҳужумчилар: Роберт Левандовски («Бавария»), Карим Бензема («Реал»).
«Боруссия Д» ҳужумчиси Эрлинг Ҳоланд келажакда қайси жамоага ўтиши борасида январь ойи охиригача бир қарорга келади.
Marca нашрининг ёзишича, 21 ёшли ҳужумчи ҳозирда унга қизиқаётган клублар билан норасмий музокаралар олиб бормоқда. «Барселона» вакиллари футболчи билан учрашув ўтказган, шунингдек, «Реал» ҳам келишувни амалга ошириш устида ишламоқда.
Гарчи «Барселона»да молиявий имкониятлар мақтанадиган даражада бўлмаса ҳам клуб президенти Хоан Лапорта Ҳоланд трансфери учун ҳаммага нарсага тайёрлигини маълум қилган. Мадридликларда эса бу борада ҳаммаси кўнгилдагидек.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)